يا ناس البحر . جنيدابي وصل

صفحة 2 من اصل 11 الصفحة السابقة  1, 2, 3, ... 9, 10, 11  الصفحة التالية

استعرض الموضوع السابق استعرض الموضوع التالي اذهب الى الأسفل

رد: يا ناس البحر . جنيدابي وصل

مُساهمة من طرف عبدالمنعم جنيدابي في الإثنين 20 أبريل 2009, 07:09

عزيزي كابتن عبدالرحمن الزين
لقد ذكرت بانك لم تتشرف بالعمل معي لكن العكس هو الصحيح فقد حفيت قدماي وتوسلت وتجرست
للعمل معك (معاي معاي في الدرب الطويل ، نحن في بدايه طريقنا كيف تقول لي مستحيل) فقد كانت الباخره التي تقودها دائما كامل العدد او (كومبليه) زي ما بيقولوا المصريين
او ( هلال \مريخ ) لانو المواهب بتاعتك كانت تملأ الافاق ، لكن ناس حبوبه وفوفو ما كانو بيدونا
طريقه .
وبالعوده لسودان لاين والبواخر فقد ذكرت بان المسئولين الذين يزوروننا في البواخر لم يكونوا
في حوجه الينا ، لكن الشاهد ان سودان لاين في ذلك الزمان ممثله في بواخرها كانت رقما صعبا
لا يمكن تجاوزه باي حال من الاحوال بالنسبه لسكان مدينه بورسودان حيث ان البلد كانت تفتقر
لابسط مقومات الحياه في ذلك الزمان وقد استفاد الكثيرين من خيراتها وكان العاملين بالبواخر
كالنجوم في المجتمع البورسوداني قبل ان تنقلب الوضاع راسا علي عقب .
وكمثال بسيط ما كانت في حلّه تطهي او دقيق يعجن في الحي الذي اقطنه الا بعد وصولي من
الرحله محملا بالصلصه والدقيق ناهيك عن بعض الضروريات الاخري حتي ان الامهات في
الحي كانت كل واحده تتمني تزويجي باحدي بناتها بما فيهم (......) مع العلم بان معظم
ساكني هذا الحي كانوا من ميسوري الحال
اما من ناحيه الخرت ،..دي ما فيها شك ابدا ولما كنا نسمع بوجودك في احدي المناسبات
كنا نكب الزوغه وندمدم وننوم .
اخيرا اشكرك كل الشكر علي هذه المداخله الجميله
ودام الود بيننا
جني


عدل سابقا من قبل عبدالمنعم جنيدابي في الثلاثاء 21 أبريل 2009, 03:07 عدل 2 مرات

الرجوع الى أعلى الصفحة اذهب الى الأسفل

رد: يا ناس البحر . جنيدابي وصل

مُساهمة من طرف الرشيد شمس الدين عبدالله في الإثنين 20 أبريل 2009, 13:02

الحبيب الأعقل جنى يا عجيب
ما تتصور مدى سعادتى وأنا أتابع البوست الظريف بتاعك بشغف زائد .... لكن المشكلة إنك بقيت ذى عبدوس تمسك موضوع وتفكو وتمشى للتانى بدون ما تخلص الأول .... ولكى أعود بك للكورس الصحيح أرجو أن تكمل هذه المواضيع التى بداتها وهربت منها قبل أن تكتمل :-
... موضوع أخينا كابتن مصلح ومافعله بك !!!!
.... باقى موضوع أخينا الذى طلب حق اللجوء فى إريتريا ...
.... قصة الكانوا دايرينك تتزوج بنتهم حتى ناس ...... ديل منو ؟
...... باقى قصة حسن جيد التى بدأتها ...
.... عجبنى جدا إسم إيفيانى للفاتح ماسورة وبالمناسبة إكتشفت الشبه الشديد والله ..
بالمناسبة يا عبدوس ماسورة فكوا ليهو الجبيرة لليد المكسورة لكن مايزال الألم موجود والمؤسف إنه سافر بورتسودان قبل إكتمال العلاج ...قال إيه ؟ الشغل كتير ...التقول بارويل دى ملكوها ليهو !!!
تعرف يا عبدوس لقى الكسر كان مثبتنو ليهو ب ALLEN KEY .. التقول دريكسون ...
وبذلك تحولت الأصابع الذهبية إلى أصابع حديدية ...
بالمناسبة إعترف لى بإنه إكتشف إنه الأنامل الذهبية دى أهم حاجة فى الدنيا وقال لى قول لعبدوس :- امنت بيك عديل كدا والله ..
شكرا جنى الحبيب ولا عدمناك أبدا وليدم أبدا مابيننا ..

الرشيد شمس الدين

الرجوع الى أعلى الصفحة اذهب الى الأسفل

بيان رقم 4 : ابوالدقيق

مُساهمة من طرف عبدالمنعم جنيدابي في الثلاثاء 21 أبريل 2009, 02:56

جدولت اداره الشركه مرتب عامل اللاسكي في مجموعه واحده مع مرتب الضابط والمهندس التاني .
كان معنا ضابط ثاني لم يكن يعجبه هذا الوضع وكان دائما ما يسب ويلعن في سلسبيل الاداره التي وضعته
وضابط اللاسكي قي خانه واحده .ولكن بالرغم من ذلك كان يتعامل معي كشخص ، بكل موده وحب واحترام .
فهو شخص بسيط ، وطيب القلب .
كان هذا الشخص يحب الملوخيه حبا شديدا ، وانا لا اكلها بسبب المصران . وفي يوم الملوخيه كنت اتفق
مع السفرجي الاول ورئيس السفرجيه بحفظ افطاري كي استخدمه في وجبه الغذاء .
وعندما يبدآ صاحبنا في عمل الفته ، احضر انا الي الديوتي وابادره بالسلام فيرد باحسن منه وهو يقلب في
صحن الملوخيه ممنيا نفسه بوجبه دسمه . وكما هو مرسوم في السيناريو يحضر السفرجي الاول ويبادر مرحبا
بضابط اللاسكي ، وهنا نسمع صوت المعلقه والسكين في صرير شديد ، وعندها كنت اطلب من السفرجي الاول
باستدعاء رئيس السفرجيه ، فيحضر. وكما هو مرسوم ايضا كان يسآلني ما هو طلبك في الغداء اليوم ؟
فاجيب انا ..احضروا لي الخاص بتاعي . وعندها يبدآ صاحبنا يرغي ويزبد ويتطاير فينا رزاز الملوخيه وحبات
الارز ، وفي النهايه نجد صحن الملوخيه مقذوفا في الهواء واخونا يسب ويلعن سلسبيل الاداره التي جعلت
لهذا العامل اكل خاص و.......يحرد الغداء ، ويغادر الديوتي.
والغريب في الامر اننا كنا نكرر له هذا المقلب علي مدار الرحله في يوم الملوخيه وفي كل مره كان مصير
الفته نفس المصير حتي ولو كانت الملوخيه (فروزن)

تحياتي وحبي واشواقي لك اخي وصديقي ابو عبيده ماهر
سؤال تخريمه :دي كيف يا رشدي ؟ انشاالله ما فيها حاجه ناقصه ؟
ونواصل ،،،،،،،،،،،،،،
جني

الرجوع الى أعلى الصفحة اذهب الى الأسفل

رد: يا ناس البحر . جنيدابي وصل

مُساهمة من طرف عبد الرحمن الزين2 في الثلاثاء 21 أبريل 2009, 15:26

واللة الذكريات عندك استاذ جنيدابي... شكرنا لك بلا حدود.. نحنا طبعا ما حضرنا عالم الازرار ولا يمكن ان نتخيل الباخرة بدون ماركوني كما تعارف ان يطلق عليهم.. المرة الوحيدة التي اضطررت فيها ان ابحر بدون ضابط لاسلكي كانت عندما نزل العزيز جنبلان مع زوجته للعلاج في المانيا وكان ذلك قرار اتخذته حتي لا نتاخر... مع كل ضباط اللاسكي الذين عملت معهم لي ذكريات حلوة وكان بيننا من الود والاحترام ما يعجز الكي بورد عن سرده..بدءا بالعزيز حبوبة الذي عملت معه لاول مرة وانا كديت علي ظهر سنار في اوخر عام 70 نهاية بي حبوبة ذاتو والذي ودعت البحر في رحلة بدارفور عام 88 مرورا بكل الزملاء الافاضل المرحوم العزيز الطاهر النقي محمد العوض والمرحوم حمام والمرحوم جمعة صالح صارمين والقائمة تطول وتطول ولولا خوفي من رشدي كنت ساقول باني اعدكم بسرد ذكريات حلوة خلال هذه الفترة... غايتو انا ما وعدت قلتة انوي ان اعد... والي لقاء مع مودتي
عبد الرحمن

الرجوع الى أعلى الصفحة اذهب الى الأسفل

رد: يا ناس البحر . جنيدابي وصل

مُساهمة من طرف ود كرار في الخميس 23 أبريل 2009, 05:04

الاخ جنى...

الشى شنو البوست بتاعك ده مركب ليه تيربو ...ماشاء الله...كل ما اتصفح لكيما اشارك احجم لروعت السرد الجميل ....

كما قلت فى بوست عمنا عبدوس لولا تعب اليوم ومعانات السواقه فى شوارع جده لكنت اسهبت ...ولكن لنا عوده.

لك الود...

الرجوع الى أعلى الصفحة اذهب الى الأسفل

رد: يا ناس البحر . جنيدابي وصل

مُساهمة من طرف عبدالمنعم جنيدابي في الخميس 23 أبريل 2009, 20:58

العزيز ود كرار
السرعه الماشي بيها البوست (مع انو لسه ما دوّرت المكنه ) دي هينه ، لكن
انت ما شفت السرعه العامله لي مشاكل في البيت ؛؛؛؛.

اشكرك كثيرا علي المرور وربنا يكون في عوتكم مع زحمه جده ، واتمني ان نلتقي
علي الطبيعه لاريك سرعتي علي الطبيعه .

تحياتي وفي انتظار مداخلاتك

جني لويس

الرجوع الى أعلى الصفحة اذهب الى الأسفل

تنويه

مُساهمة من طرف عبدالمنعم جنيدابي في الخميس 23 أبريل 2009, 21:07

سوف تكون هنالك مسابقه مليونيه في المشاركه القادمه باذن الله ...

فانتظرونااااااااااااااا


منعم قرداحي

الرجوع الى أعلى الصفحة اذهب الى الأسفل

رد: يا ناس البحر . جنيدابي وصل

مُساهمة من طرف عبد الرحمن الزين2 في الخميس 23 أبريل 2009, 22:26

غايتو يا جني انا بقوله من عسي... ما تخش بيني وبين رشدي وتوحة ونسابتو وخالد وود كرارو ال عكود عموما بعداك سلك ماركوني ما يعتر ليك
ود العوض .. رحمه الله.. كان انبل الناس خلقا.. سمعنا عنه من عمر داود الخليفة ونحن طلبة وكم تشوقنا لنعمل ونلتقي به.. كان لي الشرف ان اعمل معه في شندي وانا ضابط اول- كالعادة كما يقول رشدي السكرة- تخريمة انا عملت كديت بس لي تلات شهور وكانت احلي ايام عمري في البحر.. لا مسؤلية ولا لا ولا لكن حسدوني بقيت تالت بالنابة ثم تاني وفي دي لازم اعود بالتفصيل برضو قبال ما رشدي- مراقب اول البورد- ينط لي في حلقي
المهم اعود في شندي ولاول مرة في التاريخ يكون معانا اتنين 2 اي اتنين ماركوني علي ظهر الباخرة ما تسالوني ليه انا كنت شيف بس وبس.. اي عارف واحدين بقولوا ..علينا نحنا...
المهم في تلك الايام الخوالي كنا نمر بقبرص لشحن البطاطس والجزر كالعادة
ومع ذلك كنا نحمل ونشتري ما خف حمله من صغار الضان وديموجانات عصير العنب او دم المسيح علي قول اخونا حمدان.. وعندك اتنين ماركوني واسبتالية فاضية وصلحو.. فات علي حبيبنا بنقلاديش والمرحوم ود العوض ومحمد عبد القادر ان يشتروا البصل.. وهو في حلة بلا بصل....الطباخ كان عمنا المرحوم محمد صالح.. كلو شي ولا تطلعوا debit في ذلك الزمان وكانه سيدفعها من جيبو... سبحان الله كم كان هولاء الناس مخلصين... اعذروني اكتب اليكم وانا بكي جد جد... المهم احترنا كيف نتحصل علي البصل لزوم الحلة.. واذا بالمرحوم ود العوض يقول بسيطه انا اديكم ورقة موقعة مني انكم تاخدوا بصل وبعدين اخصمو من ماهيتكم اخر الشهر... وقد كان كانت اجمل فكرة شي بصل شي صلصة شي شطه المهم يكون عندك وصل وفي النهاية كلو في سلة البصلات المهم كبير الطباخين يكون مبسوط.. لهم جميعا الرحمة ولنا حسن العزاء والذكريات...
عبدوس

الرجوع الى أعلى الصفحة اذهب الى الأسفل

سلبطه

مُساهمة من طرف عبدالمنعم جنيدابي في الجمعة 24 أبريل 2009, 14:59

عزيزي كابتن عبدالرحمن
يا كابيتانو الناس ديل اساسا تبعي انا ملك حر ناصيه شماليه شرقيه تفتح
في ميدان وممكن نتفاهم في السعر ....

لكن انا ممكن اسمح ليك تتواصل معاهم بس عشان ما تبكي .

عشان ما تبكي ببكي انا

ودام الود

جني شربكه

الرجوع الى أعلى الصفحة اذهب الى الأسفل

رد: يا ناس البحر . جنيدابي وصل

مُساهمة من طرف عبد الرحمن الزين2 في الأحد 26 أبريل 2009, 03:23

العزيز جنيدابي
لكن الصلبطة عندك.. بس العذر معاك الجماعة ديل الواحد ممكن يكاتل فيهم عديل... شكرا لانك سمحت لي ان اتواصل معاهم وان شاء اللة ما تبكي ابدا الا من الفرح... بس هم وينهم.. لابدين.. ياربي فوق راي والا مشاغل الدنيا والنسوان والوليدات.. باين عليهم محرشين ما يخشو منبر فيهو اصناف عبدوس.. معزتي لا تحدها حدود.. تخريمة...حتي ابو اصابع حديد .. مال واحتجب وادعي الغضب .. ليت هاجري يذكر السبب..

الرجوع الى أعلى الصفحة اذهب الى الأسفل

رد: يا ناس البحر . جنيدابي وصل

مُساهمة من طرف عاطف عكود في الإثنين 27 أبريل 2009, 02:24

عبدالمنعم جنيدابي كتب:
عزيزي كابتن عبدالرحمن
ملك حر......... ناصيه شماليه شرقيه......... تفتح في ميدان...... وممكن نتفاهم في السعر ....
ودام الود
جني شربكه

الحبيب جن جن العجيب
الظاهر السمسرة بدت
مره كار جنيدابى ومره جنى لويس ومره جنى قرداحى ..... واخيرا جنى شربكه والله الكابتن عبدالرحمن والحاج خالد وودكرار احتارو معاك
ودام التواصل
عاطف عكود

الرجوع الى أعلى الصفحة اذهب الى الأسفل

بيان رقم 5 : عزيز قوم ذل

مُساهمة من طرف عبدالمنعم جنيدابي في الإثنين 27 أبريل 2009, 03:35

بعد مجزره الخطوط البحريه والاستغناء عن العماله بحرا وبرا للصالح العام , بدأ البحاره يجتمعون
تحت شجره بالسوق الكبير بالقرب من بائعه شاي . وبمرور الايام بدات تظهر عليهم مظاهر الفاقه
في صحتهم ومظهرهم العام . ونتيجه للضغوط الاسريه ( تنمر النساء ونسيان ايام العز كعادتهن )
والاجتماعيه ( انفضاض السامر ناس هوي يا ليلي ) والصحيه ( ظهور امراض الباركنسون ,ولين
العظام , والعشي الليلي , والتأتأه , والهوهوه ) يعني عديل كده جديع حجار ساكت في الشوارع .

كان هنالك رجل بر يوزع الزكاه في رمضان بالقرب من هذه المنطقه . وفي يوم من ايام رمضان
المبارك , وبعد ان تناول الصائمون طعام الافطار , سمعنا صافرات سيارات الاسعاف ووصلتنا التقارير
بان تدافع المواطنين في هذه المنطقه ادي الي حدوث اصابات واستشهاد البعض من طالبي الزكاه
من جميع فئات المجتمع عاملين وعاطلين ,رجال ونساء , ومن كل الاعمار السنيه .

وفي تلك الليله لم يغمض لي جفن وصافرات الاسعاف تشق علينا سكون الليل .

وفي الصباح الباكر اسرعت الي شجره البحاره وانا في حاله من الهلع , وسالت بلهفه من وجدتهم
يجلسون القرفصاء , هل هنالك اي خسائر بالنسبه لجماعتنا ؟؟؟ فاجابوني بالنفي .... ولكن هنالك
بعض الكدمات والخربشات ... والكعاكيل .
وعجبي

جني

الرجوع الى أعلى الصفحة اذهب الى الأسفل

رد: يا ناس البحر . جنيدابي وصل

مُساهمة من طرف خالد عبدالحميد في الإثنين 27 أبريل 2009, 10:53

عبد الرحمن الزين كتب:
لكن الصلبطة عندك.. بس العذر معاك الجماعة ديل الواحد ممكن يكاتل فيهم عديل... شكرا لانك سمحت لي ان اتواصل معاهم الا من ... بس هم وينهم.. لابدين.. ياربي فوق راي والا مشاغل الدنيا والنسوان والوليدات.... ..
تــــسجـــــيل حضور،،،، هى المشاغيــــــــل
نعود إن شاء الله

الرجوع الى أعلى الصفحة اذهب الى الأسفل

رد: يا ناس البحر . جنيدابي وصل

مُساهمة من طرف ود كرار في الخميس 30 أبريل 2009, 03:37

سلام لجنى ...

واصل..... اصلو حكاوى الشجر ده قمة المتعه.

لك الود

الرجوع الى أعلى الصفحة اذهب الى الأسفل

رد: يا ناس البحر . جنيدابي وصل

مُساهمة من طرف عبد الرحمن الزين2 في الجمعة 01 مايو 2009, 22:26

غايتو.. ما عارف يا جني... لي يومين بحاول اخش وما قادر.. امكن ربنا عاوز يرحمكم من عواليق اقوالي...واكيد حاج خالد ليهو دور في الموضوع.. ما علينا ...... المهم .. تحايلت واستطعت ان اخش.. هم طبعا يا جني ما عاوزني اتداخل .. لكن بعدهم...قالو ايه احترم شيبتك... يا راجل يا عجوز انته و هو وينو الشعر ذاتو اكان ابيض اكان اسود...
المهم زي ما قال ود كرار تابع ونحن معاك.. يا حليلكم يا ناس سودان لاين زما ن كنتو بالنهار في الرد سي هوتيل وباليل في الكازينو وبعد عشرة باليل اما في الكيلو او عند ام ساطور... بقيتو ناس شدر وانتظار الزكاة
اللة ينعل الكان السبب
وقطعا لي عودة
محبتي لا تحدها حدود
عبدوس

الرجوع الى أعلى الصفحة اذهب الى الأسفل

بيان رقم 6 : هجوم كاسح

مُساهمة من طرف عبدالمنعم جنيدابي في الثلاثاء 05 مايو 2009, 02:48

مع ظهور التوجه الاسلامي للادارات في السودان , بدات الدعوه في البواخر جهرا بعد ان كانت سرا .
وبدات تقام الندوات علي ظهر البواخر ... وظهر في الافق عدد من الدعاه .
واذكر اننا كنا في احدي البواخر ومع اقتراب عيد الاضحي المبارك ,بدات التجهيزات وفتحت
البنود لاستقبال العيد . وكانت اللجنه المنظمه بالباخره بقياده الاخ آيه الله يوسف طاهري
والاخ ايه الله صلاح قالقي وعدد من الملل ( جمع مله ) .
وفي صبيحه يوم العيد وبعد صلاه الصبح مباشره , بدات التهليلات والتكبيرات ,تبعتها خطبه وصلاه
العيد ثم تبادل الزيارات في الغرف .وكانت كل الغرف مشرعه الابواب ما عدا غرفه الضابط الثاني
حسن جيد الذي كان يغط في نوم عميق في هذه اللحظات .اتجه جمع كبير من المصلين الي غرفته
وطرقوا الباب .
فتح حسن جيد الباب وهو بملابس النوم والنعاس يداعب اجفانه ,فهاله ما رأي !!! جلاليب عجيبه , عمم
وقفاطين والعطور العجيبه ما تديك الدرب وهم يحملون الكعك والحلوي ,فهنأه الجمع بالعيد وهم في غايه
الانشراح والحبور والفرح . فما كان منه الا ان همهم وعاد منكبا علي سريره مواصلا نومه .

وفي منتصف النهار صعدت اليه في الورديه فبادرني باندهاش ماذا يريد هؤلاء الناس مني ؟ الا يعرفون
انني ورديه ؟ فاجبته بان اليوم هو اول ايام عيد الاضحي المبارك وهو مناسبه يحتفل فيها المسلمين
في مشارق الارض ومغاربها .لم يكترث صاحبنا بما قلته وتوجه لتحديد موقع السفينه علي الخريطه وكان
شيئا لم يكن .

فانسحبت وانا اتبسم لعفويه وبراءه هذا الانسان .

جني


عدل سابقا من قبل عبدالمنعم جنيدابي في الثلاثاء 05 مايو 2009, 02:59 عدل 2 مرات

الرجوع الى أعلى الصفحة اذهب الى الأسفل

رد: يا ناس البحر . جنيدابي وصل

مُساهمة من طرف عبدالمنعم جنيدابي في الثلاثاء 05 مايو 2009, 02:54

العزيز الحاج خالد
لو في طريقه ممكن تنقل لينا بيان رقم 2 (فصل تعسفي ) الذي فتحنا به بوست جديد عن طريق
الخطا الي هذا البوست ؟
ولك من الشكر اجزله

اخوك جنيدابي

الرجوع الى أعلى الصفحة اذهب الى الأسفل

رد: يا ناس البحر . جنيدابي وصل

مُساهمة من طرف خالد عبدالحميد في الثلاثاء 05 مايو 2009, 10:05

و قد كان ،،،،تم النقل والدمج .....بس انت واصل
اسمع يا د.جنّى فى بعض الحكى عايز تفاااصيل،،
يتبع

الرجوع الى أعلى الصفحة اذهب الى الأسفل

رد: يا ناس البحر . جنيدابي وصل

مُساهمة من طرف الرشيد شمس الدين عبدالله في الثلاثاء 05 مايو 2009, 23:19

حبيبنا جنى العجيب , لك وحشة والله شديدة , نتابع ذكرياتك الرائعة بشغف شديد والله ولقد أضحكتنى حد البكاء وأنت تحكى عن الملالى واية الله قلقالى فتذكرت قصة حدثت فى الشمالية فى حوالى عام 1953 أبان ثورة مصدق فى إيران وقد كان حينها فى إيران أحد قواد تلك الثورة من رجال الدين المشهورين ويدعى ( اية الله على كاشانى ) وقد كان فى مثل مرتبة الخمينى لاحقا , وبما أنه كان محبوبا جدا قبل إجهاض ثورة مصدق فقد قام أحد السودانيين فى الشمالية تيمنا بتسمية إبنه الوليد ( اية الله على كاشانى ) وبما أن الإسم يصعب نطقه على الكبار فقد كان الجد لاحقا يناديه بإسم
( لعنة الله تغشانى ) حتى أصبح هذا هو الإسم الرسمى له فى القرية .....
بالمناسبة ياجنى يبدو لى أنك قد إختصرت لنا رد حسن جيد الحقيقى ...إن كان ذلك كذلك نرجو أن تتحفنا بالرد الحقيقى , دمت لنا ولا عدمناك ...

الرشيد شمس الدين

الرجوع الى أعلى الصفحة اذهب الى الأسفل

رد: يا ناس البحر . جنيدابي وصل

مُساهمة من طرف عبدالمنعم جنيدابي في الأحد 10 مايو 2009, 01:26

الحبيب رشدي
والله لقد اسعدتني جدا المداخله بتاعتك ...ونتمني ان نكون سبب في
اضفاء الابتسامه في هذا المنتدي الرائع باهله .

اما بالنسبه لحقيقه ما قاله الاخ حسن جيد فقد عرفتها والله وقد حاولنا
التخفيف علي الناس ...عشان كده ما تحكّها زياده وخلي الطابق مستور.

تخريمه بسيطه : اين الشاب سعد ؟؟؟ الا يزال في ادغال افريقيا ؟؟؟

جني


عدل سابقا من قبل عبدالمنعم جنيدابي في الأحد 10 مايو 2009, 01:53 عدل 2 مرات

الرجوع الى أعلى الصفحة اذهب الى الأسفل

رد: يا ناس البحر . جنيدابي وصل

مُساهمة من طرف عبدالمنعم جنيدابي في الأحد 10 مايو 2009, 01:48

الحبيب عاطف صديق
ملك الاقتباس ....والاستنباط ....والتحليل
وبجميع الالوان احمر ..اخضر ..اصفر و....
بعدين القراءه الرهيبه ما بين السطور (طايره)

اشكرك اخي عاطف علي كل مداخلاتك المحبوكه والمنظمه والجميله
لكل ما نكتب من خطرفات .

دمت ودام التواصل بيننا .

تخريمه بسيطه : الناس ديل ما عايزين جوائز ؟؟ لانو مافي واحد
سأل عن المسابقه المليونيه .

جني

الرجوع الى أعلى الصفحة اذهب الى الأسفل

رد: يا ناس البحر . جنيدابي وصل

مُساهمة من طرف عبدالمنعم جنيدابي في الأحد 10 مايو 2009, 02:11

العزيز الحاج خالد
اشكرك كثيرا علي سرعه الاستجابه وعمل اللازم مما
يثبت بانك دينمو من طراز فريد .
بالنسبه للحكي بتفاصيل اكثر اوعدك بزياده التفاصيل
في المواضيع القادمه باذن الله مع انو عندنا ناس هنا
في المنتدي بيفهموها طايره حتي لو كتبت حرفا واحدا .

اشكرا مره اخري ودمت لنا

جني


عدل سابقا من قبل عبدالمنعم جنيدابي في الأحد 10 مايو 2009, 02:23 عدل 1 مرات

الرجوع الى أعلى الصفحة اذهب الى الأسفل

رد: يا ناس البحر . جنيدابي وصل

مُساهمة من طرف عبدالمنعم جنيدابي في الأحد 10 مايو 2009, 02:14

العزيز ود كرار
اشكرا علي المداخله
وشكرا علي لطفك
سنواصل باذن الله

جني

الرجوع الى أعلى الصفحة اذهب الى الأسفل

رد: يا ناس البحر . جنيدابي وصل

مُساهمة من طرف خالد عبدالحميد في الثلاثاء 12 مايو 2009, 09:54

عبدالمنعم جنيدابي كتب:

تخريمه بسيطه : الناس ديل ما عايزين جوائز ؟؟ لانو مافي واحد
سأل عن المسابقه المليونيه
اهو انا سألت ،، لكن ما عن المسابقة !! انما عن المليون
ياتو مليون فى زمن العولمة ده .... افرز يا جنى ،، ال بقروا الكلام ده المعايش ودّتهم اطراف الارض.
نتابع فى الحلقة القادمة إن شاء الله

الرجوع الى أعلى الصفحة اذهب الى الأسفل

رد: يا ناس البحر . جنيدابي وصل

مُساهمة من طرف عاطف عكود في الأربعاء 13 مايو 2009, 02:11

عبدالمنعم جنيدابي كتب:
السلام عليكم كبارا وصغارا
يسعدني جدا النضمام الي منتداكم العامر
عبدالمنعم جنيدابي الكان معروف ب (جني)والكان ماركوني
بمنطلون جينز وقميص مربعات
وخنفس ,
ظهر في شارع المليون بليد في بورسودان

Laughing Very Happy
الحبيب خالد اظنك انو كدة عرفت اى مليون يقصد حبيبنا جنى العجيب ؟
العزيز جنى لك التحيه والود فوق السطور وتحت السطور وما بين السطور
ابيض واسود وبى الالوان
عاطف عكود

الرجوع الى أعلى الصفحة اذهب الى الأسفل

صفحة 2 من اصل 11 الصفحة السابقة  1, 2, 3, ... 9, 10, 11  الصفحة التالية

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى