يا ناس البحر . جنيدابي وصل

صفحة 4 من اصل 11 الصفحة السابقة  1, 2, 3, 4, 5 ... 9, 10, 11  الصفحة التالية

استعرض الموضوع السابق استعرض الموضوع التالي اذهب الى الأسفل

بيان رقم 9 : برّه الشبكه

مُساهمة من طرف عبدالمنعم جنيدابي في الأربعاء 15 يوليو 2009, 06:30

الاخوه الاعزاء بالمنتدي
قبل ان نبدأ في هذا البيان نود ان نشاطر الاخ اسامه معاويه الاحزان في الفقد الجلل
الذي اصابهم ... كما نبدي اعجابنا بالكتابات الجميله التي تنتظم البوست بتاع الرشيد
ذكريات من زمن سودان لاين الجميل والتي تجعلك تحجم عن الكتابه .

علي كل ... نعود مره اخري للذكريات والبيانات .

كان ان ابتدعت اداره الشركه وظائف مبتكره في عالم البحار لمساعده موظفيها لتحسين
اوضاعهم الماديه ..وعليه فقد صعد علي ظهر باخرتنا احد موظفي مكتب الشركه ببورتسودان ..
وعند صعوده علي ظهر الباخره كان من ضمن امتعته ، جركانه فسيخ مدنكله ..كان هذا الشخص
محتاجا ان يضع هذه الجركانه امانه في ايد امينه حيث لم يكن يمتلك ثلاجه في غرفته ...وبعمليه
مسح سريعه اكتشف هذا الشخص بانني لا ..ولن ..ولم اتعاطي الفسيخ في حياتي وعليه فقد قام
بتسليمي الجركانه حتي احفظها له في ثلاجه غرفتي كامانه .

وبمرور الايام ..وبعد ان تبرمم و تسوكند و تحلول وتكندش وتفيمتو وتصن كرش وتبسبس
وتفيملي سيركل وتبنسن اند هدجز...... تقوقع .

وبعدها فقد الذاكره واصبح خارج الشبكه لكل ما فات من حياته بما في ذلك جركانه الفسيخ ،،،
وبدأ صفحه جديده في عالم البحار ..

وفي احدي الليالي وكان قد هدني الجوع ولم اجد ما اسد به رمقي ،، حينها قفزت الي خاطري
الجركانه الخطيره فقمت بفتحها في الحال وتذوق ما بها لاول مره في حياتي وكم ادهشني
ما وجدته من متعه ومذاق جميل مما جعلني اندم علي كل تلك السنوات التي ضاعت من عمري
ولم اتذوق هذا المنتج الرهييييب .
في احد الايام كان معي هذا الشخص في الغرفه واراد ان يشرب ماءا ،،وبفتحه للثلاجه وجد
الجركانه تقبع بداخلها ...ونظرا لانه كان خارج الشبكه فانه لم يتذكر بان هذه الجركانه
تخصّه فسالني ده فسيخ يا منعم ؟؟؟ فاجبته بنعم ....فاستطرد ، تعرف يا منعم انا بحب الفسيخ
حب شديد ...فاجبته بانني اعرف ذلك مما حدي به ان يندهش من اجابتي ..ثم طلب مني ان
اعطيه بعض منه فقلت له ان هذا الفسيخ قد تم اعداده بواسطه مجموعه من نساء الاسره اللائي
سوف اتزوج من ابنتهم وقد وضعوا فيه جميع انواع البهارات والمحدقات ( واخيرا سفن
كونسنتريتد نوتس ) حتي لا اتذوق طعم الكجور الذي وضعوه فيه وذلك حتي لا استطيع النظر الي
اي فتاه اخري ...ومع ذلك فتحت الفسيخ بتاعو والذي اصبح بتاعي بقدره قادر واعطيته منه
فكان ان شكرني وذهب ممنيا نفسه بان لا احرمه منه .
تواصلت زيارات صاحبنا علي فترات وعلي استحياء بحثا عن بعض الفسيخ وكنت احوقل له
في بعض الايام واقول له ما تعود نفسك كتير وبعد ذلك امنحه ما يريد ،، فيشكرني وينطلق لا يلوي
علي شيئ....وقد استمر هذا الوضع حتي نهايه الرحله ..
هذه القصه حقيقيه وهذا ما حدث بالضبط دون زياده ولا نقصان ..... فما
اطيب ايامنا السابقه وذكرياتها الجميله بحرا وبرا .

دمتم ونواصل باذن الله

جني


الرجوع الى أعلى الصفحة اذهب الى الأسفل

رد: يا ناس البحر . جنيدابي وصل

مُساهمة من طرف خالد عبدالحميد في الأربعاء 15 يوليو 2009, 11:14

عبدالمنعم جنيدابي كتب:
الاخوه الاعزاء بالمنتدي
قبل ان نبدأ في هذا البيان نود ان نشاطر الاخ اسامه معاويه الاحزان في الفقد الجلل
الذي اصابهم ...
(( نحن ايضاً كذلك))
كما نبدي اعجابنا بالكتابات الجميله التي تنتظم البوست بتاع الرشيد (( والبوست بتاع جنى العجيب))
ذكريات من زمن سودان لاين الجميل والتي تجعلك تحجم عن الكتابه .

ما بين الاقواس انما هو من عندى كاضافة لازمة للاقتباس اعلاه
انتهى؟؟؟؟؟؟؟!!!! عليه نحن محجمون اعجابا وابتهاجا

محجمون يعنى شنو ؟؟؟ كم يعنى
تخريمة2
جنى ،، بحضرة جلالك يطيب الجلوس

الرجوع الى أعلى الصفحة اذهب الى الأسفل

رد: يا ناس البحر . جنيدابي وصل

مُساهمة من طرف خالد عبدالحميد في الجمعة 31 يوليو 2009, 11:11

غيـــــــــــــــــــــــــــــــاب ما عادى ،،، خباااارك ... علّ المانع خــــــــير يا سيد جنّى

الرجوع الى أعلى الصفحة اذهب الى الأسفل

رد: يا ناس البحر . جنيدابي وصل

مُساهمة من طرف احمد محمد احمد في الثلاثاء 11 أغسطس 2009, 17:27

الأخوة الآحباب

قابلت امس اخونا جنيدابى و هو يقرأ الجميع السلام ويعتذر عن المواصلة هذه الايام نسبة لانشغاله بمتابعة موضوع تعويضات سد الشريك و التى قد تبلغ بالنسبة له بضع ......رات من الجنيهات (اترك الرقم لخيالكم) يعنى تانى الله تعلم تلموا فيه قريب.

الرجوع الى أعلى الصفحة اذهب الى الأسفل

رد: يا ناس البحر . جنيدابي وصل

مُساهمة من طرف الرشيد شمس الدين عبدالله في الثلاثاء 11 أغسطس 2009, 21:28

حبيبنا الجندوب ... والله ليك وحشة شديدة وفى غيابك الطويل إعتقدنا أنك تحوقلت أو كما يعمل الجماعة هذه الأيام إرتبطت مثنى وثلاث ورباع .... يقوم أحمد محمد أحمد يطلع لينا بإنك شريك فى سد الشريك وحتطلع ليك بالعجائب .. وبما أننى أعرف حظك كويس فأعتقد ..... رات بتاعتك حتطلع :- ( ذ..رات من التراب) رغم أمنياتى لك بالمليارات يصدق ... فى إنتظارك وإنتظار محوقل جديد لكم الود وليدم مابيننا ... بالمناسبة , تصدق ياخالد العزيز إنه ماسورة تانى نسى الباسوورد , يعنى لازم تلقوا ليهو حل , يدخل بدون باسوورد وبدون إسم للمستعمل ... يعنى دى حالة ميئوس منها خالص وهو خجلان شديد منك لكن نعمل شنو ؟؟؟؟

الرشيد شمس الدين

الرجوع الى أعلى الصفحة اذهب الى الأسفل

رد: يا ناس البحر . جنيدابي وصل

مُساهمة من طرف الفاتح محمد ادريس في الخميس 13 أغسطس 2009, 15:53

والله يا جماعه انا نسيت الباسورد مره واحده وزمان لكن طبعا الرشيد عايز اعمل ليه موضوع غايتو جنس غايتو
التحايا لكم

ماسوره صاحب بلوس

الرجوع الى أعلى الصفحة اذهب الى الأسفل

رد: يا ناس البحر . جنيدابي وصل

مُساهمة من طرف احمد محمد احمد في الخميس 13 أغسطس 2009, 20:24

ماسورة انت لسة فى الخليج ؟
حرنا و رمضان فى الانتظار.

الرجوع الى أعلى الصفحة اذهب الى الأسفل

اااادي رجعه - رمضان علي الطريقه الصااااااااااح

مُساهمة من طرف عبدالمنعم جنيدابي في الإثنين 28 سبتمبر 2009, 19:04

بلح -بليله - حلومر - نقاع زير - سموم ....شبكه مافي ,,كهربا مافي ...تلفزيون
مافي ، عقارب ، كربات ،وجميع انواع الحشرات الطائره والزاحفه ( يعني لو نزّلت رجولك
برّه السفنجه , الله معاك ( طوالي المستشفي )
النسوان يحلفوا علي بالطلاق ما بتاعت الرجال ، وابسط راجل ( جعلي ) ينؤ كاهله بثلاثه
اومليت جنبهم جبنه برمجانو...بينما نصول ونجول ونتباهي ونتبختر انا وصديقي محمد طه
الجيم ..عين..اريبا بواحد مقلوب ..مجلوط بالطوه جنبو دكوه .
هذه هي كمير الجودللاب ( توب )غرب مدينه شندي حيث امضيت بها شهر رمضان والعيد
ومن هذه المقدمه يمكنكم استنباط سبب هذا الغياب الجبري عن المنتدي .

من اكبر المكاسب في هذه الاجازه فقد كانت وقفه تامّل مع النفس والراحه عشت فيها بين
الجروف حيث الخضره والماء بعيدا عن زخم وضوضاء المدينه مع ابناء المك نمر وبناته
صاحبات (السربادوقات )
ومن اكبر الخسائر بالطبع هو افتقادي لاخباركم ولاخبار المنتدي والله اشتاق لكم جميعا
واحييكم فردا فردا ولقد اسعدني كم المداخلات الرهيبه التي وجدتها قي غيابي وكم المتداخلين
الجدد والذين احييهم وارحب بهم جميعا في المنتدي .
ولنا عوده باذن الله مع مقطتفات من الاجازه ونشكر جميع من سأل عنا في غيابنا .
وانتظرونا مع الكثير .. المثير انشاء الله

جني ود البلد



الرجوع الى أعلى الصفحة اذهب الى الأسفل

رد: يا ناس البحر . جنيدابي وصل

مُساهمة من طرف عاطف عكود في الثلاثاء 29 سبتمبر 2009, 01:17

عبدالمنعم جنيدابي كتب:

من اكبر المكاسب في هذه الاجازه فقد كانت وقفه تامّل مع النفس والراحه
وانتظرونا مع الكثير .. المثير انشاء الله
جني ود البلد

اخطر حاجة هى وقفة التأمل مع نفسك ..... والله انت قاعد او مصنقر ما مشكلة يعنى قعدة تأمل مقبولة منك لكن وقفة دى كتيرة شديد!!!!!!
الحبيب جنى العجيب والله ليك وحشة افتقدناك بجد والف حمدالله على السلامه وفى انتظار الكثير المثير كعهدك دوما
عاطف عكود

الرجوع الى أعلى الصفحة اذهب الى الأسفل

رد: يا ناس البحر . جنيدابي وصل

مُساهمة من طرف محمد الجمل في الثلاثاء 29 سبتمبر 2009, 14:47

الحبيب الظريف جني ود البلد (اسم يلخم)
قلت لي لو طلعت رجولك بره السفنجة الله معاك .؟؟ دة يا جني وضع مخيف انت كنت وين اصلا .بعدين كل انواع المصايب موجوده ........فيران في؟
والله ليك وحشه واخر مرة اتلاقينا فيها كانت1990 ده مع (الزهايمر) لك الشوق والاشتياق الشديد .محمد الجمل

الرجوع الى أعلى الصفحة اذهب الى الأسفل

رد: يا ناس البحر . جنيدابي وصل

مُساهمة من طرف احمد محمد احمد في الثلاثاء 29 سبتمبر 2009, 17:00

الحبيب جنى والف حمدالله على السلامه .

فعلا بلاد زى الكمير دى ممكن ان تخلق منك فيلسوفا.
بالله مر علينا بالخرطوم.

الرجوع الى أعلى الصفحة اذهب الى الأسفل

رد: يا ناس البحر . جنيدابي وصل

مُساهمة من طرف خالد عبدالحميد في الأربعاء 30 سبتمبر 2009, 08:27

مرحبا.....مرحـــــــبا مرحــــــــــــــــــــــــــــــبا ،، ليك وحشة ياجنى
وأأأأدى رجعة للبنابر
وفى انتظار الاخرين،،،، بنهاية العيد واجازات الصيف نرجو من الله عودة كل المختفين
الرشيــــــــد ،،،اسامة معاوية ،،عبدالرحمن محجوب،، سعد كرار،،ماسورة والبقية وكل من غيّبتهم المشاغيل

الرجوع الى أعلى الصفحة اذهب الى الأسفل

رد: يا ناس البحر . جنيدابي وصل

مُساهمة من طرف عبدالمنعم جنيدابي في الثلاثاء 06 أكتوبر 2009, 06:46

mhmdaljamal كتب:الحبيب الظريف جني ود البلد (اسم يلخم)
قلت لي لو طلعت رجولك بره السفنجة الله معاك .؟؟ دة يا جني وضع مخيف انت كنت وين اصلا .بعدين كل انواع المصايب موجوده ........فيران في؟
والله ليك وحشه واخر مرة اتلاقينا فيها كانت1990 ده مع (الزهايمر) لك الشوق والاشتياق الشديد .محمد الجمل

والله كلما اشاهد لاعب الهلال العاصمي مهند الطاهر ( الغزال ) يقلب هوبا فانني
اتذكّر الهوبا بتاعتك العملتها في لندن ليله راس السنه وانت لابس فول سوت .

بالنسبه للفيران في البلد , فلا يوجد فيران بالمعني المعروف ولكن توجد جقووووور

الحبيب العزيز الجمل والله الشوق بحر..ووالله انني في غايه السعاده للتواصل معك عبرالمنتدي
وقد اسعدني اكثر الاسلوب الجميل الذي تكتب به والذي لم يكن ابدا مفاجأه بالنسبه لي لانني قد
عرفتك عن قرب , فأنت زول فرده وواحد من اظرف ظرفاء البحر .
تحياتي لك وللابن احمد الذي اصبح رجلا يحفظكم الله
دمت ودام التواصل

جني العجيب

الرجوع الى أعلى الصفحة اذهب الى الأسفل

رد: يا ناس البحر . جنيدابي وصل

مُساهمة من طرف محمد الجمل في الثلاثاء 06 أكتوبر 2009, 11:25

الاخ والحبيب جنيدابي.. السؤال عن غالي صحتكم هو البدء والمنتهي
لن انفرد بك وحدي فعشاق الباب هم كل الاعضاء .(شخصيه عامة) ولن يرضي عني الكبار والصغار حتي لو همس الكلام .مش قلت ليك بيناتنا خيوط قوية وياريت تداوم طلتك وما تحرمنا منها .ودامت الذكري وصلا يدق في اوتار
1/ السنين
2/الايام
3/كل ما ذكر صاح
ولك ان تختار ما تراه مناسبا في ما ورد اعلاه
تحياتي لك ولكل الاحبة وبالله نزل صورتك لمن لا يعرفوك.......... ســـــــــــــــــــــــــلام

الرجوع الى أعلى الصفحة اذهب الى الأسفل

رد: يا ناس البحر . جنيدابي وصل

مُساهمة من طرف عبدالمنعم جنيدابي في الثلاثاء 06 أكتوبر 2009, 15:06

الحبيب الجمل
ماشاء الله وعيني بارده الصوره بتاعتك شباب ده شنو يا ولد ده ؟
امسك الخشب .
اما بالنسبه للصوره بتاعتي , ما بلااااااااش زي ما قال عادل امام .
واللا ما كده ؟ ده شرك واللا شنو يا الجمل ؟
دمت ودام التواصل

عمو جني

الرجوع الى أعلى الصفحة اذهب الى الأسفل

رد: يا ناس البحر . جنيدابي وصل

مُساهمة من طرف عبدالمنعم جنيدابي في الثلاثاء 06 أكتوبر 2009, 15:19

الحبيب عاطف صديق
الشوق بحارا وانهارا وخلجان ومضايق
احمد الله كثيرا بانني سعدت بلقائكم في الخرطوم هذا الخريف .
طبعا الوقفه هي وقفه السمبريه , وهي مع الجمع بين العضدين حتي
تظهر الامعاء الغليظ من الامعاء الدقيق .

دمت ودام التواصل

جني



الرجوع الى أعلى الصفحة اذهب الى الأسفل

رد: يا ناس البحر . جنيدابي وصل

مُساهمة من طرف عبدالمنعم جنيدابي في الثلاثاء 06 أكتوبر 2009, 18:02

الحبيب الوجيه احمد محمد احمد
اشواقي لا تحدها بحار
والله لقد سعدت ايما سعاده بلقائكم في الخرطوم , لكنني الان في
بورسودان لزوم كسب العيش وكده .
اما بالنسبه للكمير فقد دخلنا مره اخري في الدوامه والمعمعه ولكن عندي
فكره اصل الخرطوم وطبعا انت حتكون اول الاهداف باذن الله
وسلام مربع

جني

الرجوع الى أعلى الصفحة اذهب الى الأسفل

رد: يا ناس البحر . جنيدابي وصل

مُساهمة من طرف احمد محمد احمد في الثلاثاء 06 أكتوبر 2009, 21:48

حمدا لله سلامة الوصول الى بورتسودان ياجنى وتحياتنا الحارة لكل الاخوان .

و للذين يفتقدون بورتسودان مثلنا نهدي الفيديو التالي:

الرابط :

http://www.youtube.com/watch?v=RyKBSIbW0s4

الرجوع الى أعلى الصفحة اذهب الى الأسفل

رد: يا ناس البحر . جنيدابي وصل

مُساهمة من طرف عبد العظيم الامين الطاهر في الخميس 08 أكتوبر 2009, 03:59

جنى العجيب اسعدتنا عودتك بى كربك وعقاربك!!!!وحافى حالق...وعقارب اهلنا عقارب تربية بيوت ما ادوك منهم(ام نويويره) عشان تربيها فى بورسودان وتكفيك شر المحوقلين ان وجدو!!!
والجمل دى بيسأل من الفيران مالو شاحن دقيق ولا شنو؟؟؟

الرجوع الى أعلى الصفحة اذهب الى الأسفل

رد: يا ناس البحر . جنيدابي وصل

مُساهمة من طرف عبد الرحمن الزين2 في الخميس 08 أكتوبر 2009, 15:30

عودة دي جانقو...والله كانت ليك وحشة.. عارف يا صديقي بمناسبة عودة دي جانقو ..عمك ما كان عندو مزاج في السينما وفي اوخر الستينات اصر علي المرحوم اصيل اخش معاهو سينما واظنه الفليم كان بنفس الاسم وعشان يرغبني قال لي وحاتك انا صوت الرصاص صحاني من النوم وشايف الحصين قافلات الشارع الفيهو السينما..ولا زلت اضحك عندما اتذكر كلماته ..يرحمه الله..
مرحب بيك جني اغو...وفي انتظار ابداعاتك
عبد الرحمن

الرجوع الى أعلى الصفحة اذهب الى الأسفل

رد: يا ناس البحر . جنيدابي وصل

مُساهمة من طرف خالد عبدالحميد في الإثنين 12 أكتوبر 2009, 10:26

عودة ديجانقو وعودة كبير المنتدى
ليك وحشة والله يا عبدوس ،، طالت الغيبة وغايتو ما عرفنا نخش ليك من وين شان نقول مشتاقين
لكن كلها بوستات الله!!
كدى النخش من بوابة جنّى الذى عاد من بلاد ما وراء ال.. وفى انتظار وعده عن مقتطفات من الاجازة
وهنا ايضا تلقى فيديو قبطان احمد عن بورسودان فى تطويع بديع للتكنلوجيا ،،،تكاد تلمس الشوارع بيديك،،ما عادت هى بورسودان القرن الفات،،لولا بقية من غربان استعصت على كاميرا المصور
ونعرج على قصيدة سودانى جد وشكرا على مرورك من هناك ،،،واخر الايه به استثناء

وفى بوست سودانى جد (((كان)) هناك رابط لى زولاً ما لقيتلو مثيل !!حاجة كده زى الخرافات والغول والعنقاء،،،ما تعرف احمدمحمد احمد جابو من وين ،،،،
لكن شايف الموضوع بقى الفاتك فوتو؟؟ انا غايتو مافاتنى (والحمد لله) لكن لزوم الشمار وكده احمد قال المغروض فى الرابط يتصل عليه
وفى انتظار عودة كل الغايبين
ودام التواصل بلاحدود

الرجوع الى أعلى الصفحة اذهب الى الأسفل

حفل زواج في الكمير

مُساهمة من طرف عبدالمنعم جنيدابي في الخميس 15 أكتوبر 2009, 06:32

سجل عندك يا عاطف واحد من المستجيبين .

نعود ... وبعيدا عن الكربات والدبايب والعقارب والجقور ( والحاصل )
والحاصل دي يشرحها الاخ الحبيب عبدالعظيم الامين والذي كنت اتوق لمقابلته
هو والاخوان ود كرار وابوبكر فضل ساتي اثناء تواجدي بالخرطوم . بالنسبه
للاخ ود كرار فقد سعدت بمحادثته عن طريق الهاتف وقد وعدني بالحضور
لمشاهده المحوقل ولكنه لم ياتي ابدا . يكون هرش ؟؟؟؟؟

المهم ... فقد لبيت دعوه كريمه لحضور حفل زواج احد شبان القريه بالكمير..
وفي الحفل ادت الفتيات اغاني الفروسيه والحماسه وكانت الالات الايقاعيه عباره عن
الجركانات والعلب الفارغه والحلل !!!
ومع اغاني الحماسه والفروسيه قام العريس بجلد جميع شباب القريه.. وفي النهايه
جاء العشاء الذي كان عباره عن بوفيه مفتوح يتكون من ( الاسم الثاني
لوزيره الخارجيه الامريكيه السابقه ) باللبن .

تخريمه :
ترحيب حار وابتهاج متأخر بعوده دان فاديس .. والله لقد نّورت المنتدي
بحضورك الجميل وفي انتظار جاك بلانس الذي طالت غيبته .

جني استجابه

الرجوع الى أعلى الصفحة اذهب الى الأسفل

ياناس البحر جنيدابي وصل

مُساهمة من طرف راشد في الخميس 15 أكتوبر 2009, 17:32

لك التحايا بعمق البحر وامتداد الفضاء ...يامرحبا بك في المنتدي وانا صراحة اسعد الناس بهذا المنتدي فمن خلاله اقمت قاعدة كبيرة من كل الاخوان الاعزاء الذين درسوا باسكندرية او عملوا بالبحر بشكل عام ....
سعادة موصولة مزدوجة والشكر في آن لتعريفك لي بموقع شهس....
وياهلا بيك

الرجوع الى أعلى الصفحة اذهب الى الأسفل

رد: يا ناس البحر . جنيدابي وصل

مُساهمة من طرف عاطف عكود في الخميس 15 أكتوبر 2009, 23:31

عبدالمنعم جنيدابي كتب:
[b]
سجل عندك يا عاطف واحد من المستجيبين .
نعود ... وبعيدا عن الكربات والدبايب والعقارب والجقور ( والحاصل )

جني استجابه
الحبيب جنى استجابه
استجاب الله لكل دعواتك وامانيك واحلامك ماكان منها فى اليقظة او فى منامك
وحفظك من عقرب ودبيب
اما الجقور والكربات و (الحاصل ) فلنا عودة انشاء اللة بعد استجابة اخونا عبدالعظيم
والتحايا والترحيب بالعزيز راشد
ودام التواصل
عاطف عكود

الرجوع الى أعلى الصفحة اذهب الى الأسفل

رد: يا ناس البحر . جنيدابي وصل

مُساهمة من طرف خالد عبدالحميد في الجمعة 16 أكتوبر 2009, 10:19

عبدالمنعم جنيدابي كتب:
[b]


ومع اغاني الحماسه والفروسيه قام العريس بجلد جميع شباب القريه.. وفي النهايه

جني استجابه
جنـــــى،،دى ورطة فوق تحت،، يمين شمال محل ما تلف
انت كنت وين فى الحظة ديك،،،، ان انجلدت فهذه ورطة
اما ان مرقت من جبل الشباب فوالله أورط
حمدا لله على السلامة،،كلنا فى الامرين شرقٌ
اشواق الف،،،،،

تخريمة
راشد كتب:
سعادة موصولة مزدوجة والشكر في آن لتعريفك لي بموقع شهس....
وياهلا بيك
مرحبا بإشراقة راشد الصغير،،ما شاء الله
قد اعود للكلمة (( شهس )) فقد استفزت خليط الرطانة المعجون بالعربى المكسر فى ألسنة جدودى
اشواق عابرة للزمن

الرجوع الى أعلى الصفحة اذهب الى الأسفل

صفحة 4 من اصل 11 الصفحة السابقة  1, 2, 3, 4, 5 ... 9, 10, 11  الصفحة التالية

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى