(بعض من أجمل ما سمعت)

صفحة 2 من اصل 10 الصفحة السابقة  1, 2, 3, 4, 5, 6, 7, 8, 9, 10  الصفحة التالية

استعرض الموضوع السابق استعرض الموضوع التالي اذهب الى الأسفل

رد: (بعض من أجمل ما سمعت)

مُساهمة من طرف عاطف عكود في الإثنين 07 سبتمبر 2009, 03:55

احمد محمد احمد كتب:الاخوان ابو احمد - عاطف - خالد وبقية الاخوة الاعزاء لكم اطيب التمنيات . و يا خالد يسمع منك ربنا لكن الحقيقة بقى الواحد ما بستوعب اي مادة ادبية تفوت الخمسة سطور.

و يا ابو احمد انت الخروف ما اكلته زمان فى شكل حلل فى بورتسودان. انت نسيت و لا شنو؟
تحياتى لاحمد و اخوانه.

العزيز احمد محمد احمد مازلنا فى الانتظار اى شى (شعر او كلام ) وقبلانين حتى ولو بى خمسة الا ربع من السطور .
اما بخصوص الخروف والحلل شايف اخونا الجمل لم يثبت او ينفى ولمدة اربعة وعشرين ساعة وعليه .........
اخونا محمد احمد الجمل فى انتظار عودتك والجاتك فى خروفك سامحتك والعرجة لى مراحة ....
اها ارح
ودام التواصل
عاطف عكود

الرجوع الى أعلى الصفحة اذهب الى الأسفل

رد: (بعض من أجمل ما سمعت)

مُساهمة من طرف محمد الجمل في الثلاثاء 08 سبتمبر 2009, 05:51

عرفت يا عاطف تستدرج الجميع لكن يظهر احمد محمد احمد (غلبك)يظهر كده انو بطانيتو من النوع( التقيل) بعدين انت ذاتك البستدرجك منو ...........اكتب لينا عن أطرف المواقف التي مرت بك وانا عارفك دمك شربات .....اها ارح

الرجوع الى أعلى الصفحة اذهب الى الأسفل

رد: (بعض من أجمل ما سمعت)

مُساهمة من طرف عاطف عكود في الأربعاء 09 سبتمبر 2009, 04:39

mhmdaljamal كتب:عرفت يا عاطف تستدرج الجميع لكن يظهر احمد محمد احمد (غلبك)يظهر كده انو بطانيتو من النوع( التقيل) بعدين انت ذاتك البستدرجك منو ...........اكتب لينا عن أطرف المواقف التي مرت بك وانا عارفك دمك شربات .....اها ارح

العزيز الجمل سامحك الله لقد اتهمتنى زورا وبهتانا باستدراج الغير وهو مالم يحصل فانى برىء من ذلك !
اما اخونا احمد محمد احمد فله من المشاركات والمداخلات مافاق الستين حسب نظريه الفراشه والنحلة لمحمد على كلاى ؟
واخيرا ولا تزعل ساقوم بمحاوله استدراج نفسى بنفسى يعنى بالعربى كدى ساحاول ان استدرجنى انا ... ونشوف النتيجه .... واها ارح
ودام التواصل
عاطف عكود

الرجوع الى أعلى الصفحة اذهب الى الأسفل

رد: (بعض من أجمل ما سمعت)

مُساهمة من طرف محمد الجمل في الأربعاء 09 سبتمبر 2009, 14:47

القصص و الحكايات التي تروي عن البحر (المخزن الكبير) كما يطلق علية اليونانيون كثيرة و شيقة ولا تخلو من الغرابة ولا تنتهي,. فالذين ركبوا البحر هم كثر ولكن قليلون هم من يجود يراعهم فيسطروا ما شاهدوا . وقد يكون هؤلاء الذين لا يكتبون لديهم الأكثر غرابة و تشويقا لذلك نحكي عنهم بلسانهم فهم أيضا إخوة لنا وزملاء نودهم ونحفظ لهم روائع ذلك الزمن الجميل ......
حدثني صديقي ونحن جلوسا في مقدمة السفينة وهي تمخر بنا عباب البحر متجهة إلي احدي موانئ استراليا وتحديدا في تلك اللحظة كنا في قلب المحيط الهندي كان الجو رائعا والشمس علي وشك المغيب وهي قاب قوسين أو ادني لتودع شروق ذلك اليوم الربيعي الجميل والسحب في السماء ترسم لوحات متفرقة في قمة الروعة والجمال , علي كل ما زال الجو يزداد جمالا وروعة والحديث مع صديقي أيضا يزيد الجو حلاوة وأنت تستمع إلية فاغرا فاهك لغرابة ما تسمع ...........
حدثني صديقي قائلا انه وفي يوم من الأيام كانوا باتجاه أمريكا وهم مرورا بمنطقة المثلث العجيب مثلث برمودا المثلث الذي لا يخلو من العجائب والغرائب والقصص التي لم يوجد لها تفسيرا حتى يومنا هذا ولعلمكم وانتم الادري والاعلم ( إن مثلث برمودا يتشكل باضلاعة الثلاثة المتساوية في الطول 1500كم ما بين بورتوريكو وفلوريدا وجزيرة برمودا في مساحة مجملها 1.1مليون كم مربع وأعمق نقطة في نطاق مثلث برمودا الذي يقع في المحيط الأطلسي في المياه الدولية 30.100 قدم ..) فهذا العمق الذي ابتلع الطائرات من الجو والسفن الضخمة من سطحه فلا عجب أن يخرج من جوفه ما لا يصدق , يروي صديقي قائلا : ما أن توسطت بنا الباخرة منطقة برمودا حتى حدث عطل في محركاتها فبداء أفراد الطاقم في غاية الهمة والنشاط لإصلاح ذلك العطب حتى تتحرك السفينة من هذه المنطقة اللئيمة لعلمهم أنها قد تتعرض لتلك العاصفة القادمة نحوهم علي بعد 150ميلا بحريا خاصة وانهم بدأوا يشتموا رائحتها فمعروف عن البحارة أنهم يدركون التقلبات الجوية بكل حواسهم وقبل حدوثها لكثرة تكرارها وطول خبرتهم بالبحر.......... حدثني صديقي انه كان واقفا بالجانب الأيمن للسفينة علي ارتفاع ليس بالبسيط ينظر إلي البحر فاستوقفت نظره تلك الشيمة المائية التي تتحرك بهدؤ نحو السفينة وحولها دائرة كبيرة دقق النظر وأمعن محاولا اختراق سطح البحر ليحدد نوع هذا الشيء القادم نحوه , وفجاءة أطلت عليه تلك الأرجل المخيفة لحيوان الحبار بحجم لا يمكن وصفه حتى بداءت عيناه واضحة وتقاسيم عضلاته أكثر وضوحا فشب علي سطح الماء ممعنا النظر إلي أخينا الواقف بجانب السفينة وكأنة ينظر إلي وجبة شهية كيف الوصول إليها ؟ فهرول صديقي إلي داخل السفينة وكأنه يسمع من وراءه ما بدأ وكأنه هجوم ذلك الحيوان خلفه ولكنه لم يكن سوي صوت الأبواب التي يخترقها بكل قوته ..وعند وصوله إلي صالون الباخرة والجميع جلوس إذ أمامهم شخص يعرفونه ولا يعرفونه فشعر رأسه بدأ وكأنه شد بحبال إلي اعلي وعيناه جاحظتان لا يرمشان فهب الجميع وقوفا يستفسروه ماذا حدث ولكن تتابع أنفاسه وسرعة ضربات قلبه لم تساعده في إخراج الكلمات واضحة وصحيحة فأمروا له بكوب ماء وكوب عصير وتركوه حتى هدأت أنفاسه وبدأ يحكي لهم قصة الحبار العجيب . ..........

..............صه

الرجوع الى أعلى الصفحة اذهب الى الأسفل

رد: (بعض من أجمل ما سمعت)

مُساهمة من طرف عبد الرحمن الزين2 في الأحد 13 سبتمبر 2009, 05:06

عزيزنا محمد احمد طه ... ابداع ....ولكن نتمني بعد ان تكمل قصة الحبار العجيب ان تحكي لنا حكاية ناس الاطباق الطائرة والذين هبطوا علي سطح قوارب النجاة- boat deck- في ورديتك بعد منتصف الليل خاصة وانت كنت شاهدا بل الشاهد الوحيد....
محبتي وتقديري
ابو عابر

الرجوع الى أعلى الصفحة اذهب الى الأسفل

رد: (بعض من أجمل ما سمعت)

مُساهمة من طرف محمد الجمل في الأحد 13 سبتمبر 2009, 14:30

عزيزي ود الزين ......... كانت فكرة (بعض من اجمل ما سمعت) وما شابهها من ابواب جديده ظهرت في الفتره التي غبتم فيها كان القصد منها فتح ابواب جديده ومنح فرصه لابنائنا الذين بدأوا يتوافدون بالانضمام لمنتداكم بالاستمتاع وان يكون حضورنا نحن الكبار ذا ملمس (touch)ظريف ومفيد بقدر الامكان ...علي كل اشكرك استاذي ود الزين والقصص كثيره والبحر ايامو كانت جميلة وانت اكثرنا خبرة وتجربة فالتبدأ لنا ويا حبذا لو كانت قصة الطبق التي الفها اخونا الرشيد ونسبها لي وانت عارف اخونا لسانو متبري منو من زمان ............أخوك محمد الجمل

الرجوع الى أعلى الصفحة اذهب الى الأسفل

رد: (بعض من أجمل ما سمعت)

مُساهمة من طرف عاطف عكود في الإثنين 14 سبتمبر 2009, 04:18

الف مرحب باخر الاعضاء الجدد جنابو احمد محمد احمد طه الجمل
مرحبتين بيك فى المنتدى بين اعمامك و اخوانك (ابناء الزملاء ) وانتم من الجيل الذى قضى ايام طفولتة وجزء من صباه وشبابه مبحرا واكيد لكم من الزكريات والمداخلات التى سوف تثرى صفحات المنتدى
ودام تواصل الاجيال
عمك عاطف عكود

الرجوع الى أعلى الصفحة اذهب الى الأسفل

رد: (بعض من أجمل ما سمعت)

مُساهمة من طرف AHMED TAHA ALJAMAL في الخميس 17 سبتمبر 2009, 21:32

بسم الله الرحمن الرحيم

السلام عليكم ورحمة الله تعالي وبركاته

من باب قول الرسول صلى الله عليه وسلم (من لا يشكر الناس لا يشكر الله )

لذلك أتقدم بالشكر الجزيل إلى جميع أعضاء هذا المنتدى

وأخص بالذكرالعم الحبيب عاطف صديق على الترحيب
وتبدأ الخطي واشياء اخري كثيره مجهوله
ahmed mohamed ahmed taha

الرجوع الى أعلى الصفحة اذهب الى الأسفل

رد: (بعض من أجمل ما سمعت)

مُساهمة من طرف عبدالرحمن محجوب يوسف في الأحد 20 سبتمبر 2009, 16:44

الإخوة الأعزاء كل عام وانتم بألف خير وعافيه ونسال الله أن يبلغ كل منا مقصده فيما يرضيه سبحانه وتعالي آمين.

الرجوع الى أعلى الصفحة اذهب الى الأسفل

رد: (بعض من أجمل ما سمعت)

مُساهمة من طرف Admin في الجمعة 06 نوفمبر 2009, 11:24

أديبنا وولدنا عبد الرحمن محجوب ،،، نراك تدخل على عجل ،،،نفتقد قلمك الرشيق... لسه فى الحوض ؟؟؟ لك الود

Admin
Admin


معاينة صفحة البيانات الشخصي للعضو

الرجوع الى أعلى الصفحة اذهب الى الأسفل

رد: (بعض من أجمل ما سمعت)

مُساهمة من طرف عبدالرحمن محجوب يوسف في الإثنين 09 نوفمبر 2009, 02:57

لكم العتبي حد الرضي
اغارتني خيول الشوق ليلا+فطار اللب من فرط الصهيل
غير اني اتيت راكباعنزة قرجه ولوفه حلوبه في الزمن الهلاك منجه

الرجوع الى أعلى الصفحة اذهب الى الأسفل

رد: (بعض من أجمل ما سمعت)

مُساهمة من طرف عبدالرحمن محجوب يوسف في الأحد 20 ديسمبر 2009, 20:26

خلدي تحايا واشواق دافئه في جوكم البارد ده, وين عوكاتك ؟ وعكود معرفتك للبلوله ادهشتني!
راشد تحياتي وانا مثلك في تأخر التهنئه للدكتوره آمنه شمس الدين أغر الله بها عيني ابويها.ويـــــــــــــــــــــــــــــــــــــــــــــن القبطان الجميل الجمل؟؟؟؟؟؟؟؟؟
اعجني كثيرا ما كتب المرحوم الشريف الهندي في اوبريت سودانيه وزاد عليه رونقا وبهائا اداء الدكتور الكابلي متعه الله بالصحه والعافيه
اقتطف منه الاتي علي عجل
بشوفك في عيون النيل وفي الاطفال
وفي تاريخك الاخضر علي الاجيال
وفي بحر الدمي ’ اللسع بجم سيال
وفي مستقبلا واعد كبار وعيال
بشوفك بشري فيك’ شقق جبال ورمال
وفي حدقاته مفتوحات تلاته ليال
الي ان قال
ويكون عيدنا الكبير في مقرن النيلين
ومبنساك ’ومابنساك عشان يطراك في الازمان
قريب منك قرابة الحدقه للانسان
وجايل فيك ’ جولة الدم علي الوردان
وقيمتك عنده ’ زي قيمتك معاه زمان
بعيشك هضبه ، بتشارف تلال قيسان
ويحياك مويه ’ في دارفور تبل عطشان
ويديم فيك من سنار ترع خزان
ويدفق خيره بي عند الرهد بستان
الي ان قال
منو الزيك ’منو الزيك ولد واستالد الاولاد؟
منو الزيك’ بجيبم ديمه عشره اولاد؟
منو الزيك , ببز الدنيا مويه وزاد؟
منو الزيك ’ ضروع وزروع ونيل مداد؟
منو الزيك ’ بطانه وغابه دون حداد؟
منو الزيك ’ سهول وادي وجبال اوتاد؟
منو الزيك , اصل موروث من الاجداد؟
منو الزيك ’ جراتق دم قدام وجداد؟
قشي الدمعه يابت الرجال ما بحكموك اولاد
بت الحر.. وأم الحر.. وأخت الحر
وست الضنبه مردوم بي وراه يجر
ست الفي الخشش من العصير بنتر
وست الخيل وست الفي القلوب بنقر
الي ان قال سائحا في الوطن الكبير مترنما
تيلادك مسكر في الخزن محروس
هجليج واندراب’ومهوقني وابنوس
من صمغ الهشاب’ سوي السنط كرتوس
ومن شجر التبلدي’ المويه كوس في كوس
ومن ضل النخيل’الشمس دايرة تكوس
ومن حرب المطر’فرع الحراز مدروس
ومن شوك السدر’ جيش السلم هكسوس
ومن زهر التبر’الباديه باقيه عروس
وبي توب البرم’سوي الطلح ملبوس
ومن شدر الاراك’عطر الدعاش مبثوث
ومن سيف العشر’جيش هكس صار مهروس
والدوم واجي’بي قيف الاتبراوي خروس
فيكي الفيل وفيكي العنجه والجاموس
وفيكي التيتل الليات قرونه تروس
وفيكي الاصله والدابي اب درق وجروس
فيك اسد العرين’رب العراك والدوس
وفيك ريل الودي’ البي نالو راتع اجوس
وفيك فهود’وفيك نمور,وفيك طاؤوس
وفيك صقر الكواهله’العينو كالفانوس
وفي نيلك عشاري’اشيل من الجاقوس
فيك الأزرق،البي عرقو هد القيف
وفيك الأبيض، الماش منطرح مابقيف
وفيك رهد المفازه،الوعده ما خليف
وفيك الأتبراوي، اللي الشواطئ اليف
وفيك الدندر،البهجم هجمة السيف
وفيك الباسلام،الفي الفشقه عامل هيف
وفيك سيتيت،منبت من قناة صريف
وفيك القاش،بوري الرعدة والصاقعه الدوادم كيف
وفيك بحر الجبل،حاقب عري الرجاف
وفيك بحر غزال،والجور وبحر زراف
وفيك سوباط،ملولو زي دبيبا خاف
وفيك بحر العرب،مليان نعام وزراف
وفيك بحيرة قال نو،سيدها ما الاسلاف
وفيك خور اب حبل،شاقي البلد كشاف
وفيك تمت العظيم،شايل الكليت والشاف
وعندك مقرنا،حرم سواك ما انشاف
وبعدها يتسائل مبدعنا
امانة عليك بطانة اب سن،بتنسي الكاعه
يوم اكلت كباد ساكت،رخم وضباعه
يوم محمود وناس عوض الكريم سمساعه
واقفين في الشمس،دايرين يغطو شعاعا
في ضحوة عجاج،وسيوفم اللماعه
ياكلن في التراقي،ويقطعن في ضراعها
يا المعزوزه بي دمانا وعضام ابواتنا
عارفنك مقريفه لي شراب قهواتنا
زغرتي يا ام شيوم،خلي الندق نحساتنا
ونحاسب عقاب الجاتنا والما جاتنا
وبعد المسح الجغرافي الدقيق يقول
حبابك عشره،يابت مقرن النيلين
حبابك يا أم عجن،بعد العديل والزين
حبابك يا المحكره في المشاعر،والفؤاد،والعين
حبابك يا المغسله،بي طهور مويتين
حباب قصرك ضبح غردون من الاضنين
حباب الخندق،العجن الجلود بالطين
الي قوله
سلام يا القلعه،بي بدورها وجواهر تاجها
سلام يا اب عنجه خورك لاقي نيلو الناجا
سلام يا اب روف وودنوباوي ضوي سراجا
سلام ديم اب سعد نار الخيم وجاجه
بحر ابيض فتح ابوابو وقت الحاجه
زي ما موسي عد بلا تعب لا حاجه
كلك ادباء من عشاق وفنانين
شالوك في عيونم وصوروك تلوين
وشاشوبك شعر مطبوع جزيل ورصين
فيه ام در وفيه الاسكله وستين
وعازة الفي هواك نحن الجبال ثابتين
يا فلق الصباح قول لي نهارك وين
ترعاك في الفؤاد بعناية الحارسين
يا كروان كرومه خليل فرح ما يلي
يا ود الرضي القلبه انقطع نصين
تري العبادي ماسك الدابي بالايدين
مع ابو صلاح ونور الكهربائي الزين
فيك الحاج سرور غني الفراق لي متين
وما عارف المفارق قدمو ماش لي وين
ويا عازة الفراق طال بي وكلي حنين
ارجو ان لا يكون اختزالى قد افسدها
عزرا للاطاله اللهم ارحم مبدعنا واسكنه عندك في جنات النعيم امين مع الود

الرجوع الى أعلى الصفحة اذهب الى الأسفل

رد: (بعض من أجمل ما سمعت)

مُساهمة من طرف عاطف عكود في الثلاثاء 22 ديسمبر 2009, 17:55

العزيز عبدالرحمن محجوب حمدالله على السلامة ومنور المنتدى
وعودة قوية مع اوبريت السودان للمرحوم الشريف الهندى والحان كابلى ولمسات محمدية فقد شمل التاريخ والجغرافيا... الارض والبشرية .... الفن والسياسة .... النهر والجبل والشجر... العمل و الزراعة والرعى .. البادية والحضر ... الشعر والادب ولم ينسى امدر ومبدعيها من كل السودان .
ودام التواصل
عاطف عكود

الرجوع الى أعلى الصفحة اذهب الى الأسفل

رد: (بعض من أجمل ما سمعت)

مُساهمة من طرف محمد الجمل في الإثنين 01 فبراير 2010, 16:38

رحلة النيل للشاعر الفذ ود جماع والبحر القديم ...و .. و ..
يلا حركوا لينا يا راشد وعاطف وصاحب السبق عبدالحمن هذا البوست
اتصل بي اليوم الاخ بابكر يوسف ووعدني بالكتابة قريبا ...وكذلك الاخ كمال الخواض توقعوه قريبا

الرجوع الى أعلى الصفحة اذهب الى الأسفل

رد: (بعض من أجمل ما سمعت)

مُساهمة من طرف راشد في الإثنين 01 فبراير 2010, 17:05

اراك اخي الجمل قد جمعت ام درمان وبحري معا ..عني دوما يهز دواخلي حضورا الشاعر الانسان ادرس جماع فقد كان انسانا مرهف الاحساس رقيق القلب ورهيفه (وهو درويش مثالي) وقد أطر الرائع سيد خليفة تلكم الصور الشعرية البديعة بأبهي إطار صوتي ...والمبدع مصطفي سند لا اظن مدحي له سضيف اليه جديد فهو شاعر فذ صاحب مخيلة تصويرية ووصفية بليغة ورفيعة في آن معا .....
ولا زلت يرتد علي صدي صوته في الكمنجات الضائعة:
وطرحت قوس َ كمنجتى جسراً ببحرِ الليل

ثم هويت للقاعِ

متورم العينين تنبضُ عبرَ أسماعِى

طبولُ العالم الهدّار : لا تأسى لمن فاتوا

فبعض مساكنٍ تبقَى وبعض مساكنٍ تنأى

فتُدنيها المسافاتُ
....................
.............
واكيد المسافات تختصر حد الاختزال في بهاء مثل هذه الكلمات التي بقيت وستبقي خالدة
اللهم ارحمهم جميعا ....

الرجوع الى أعلى الصفحة اذهب الى الأسفل

رد: (بعض من أجمل ما سمعت)

مُساهمة من طرف عاطف عكود في الثلاثاء 02 فبراير 2010, 03:40

[right]
راشد كتب:
المبدع مصطفي سند لا اظن مدحي له سضيف اليه جديد فهو شاعر فذ صاحب مخيلة تصويرية ووصفية بليغة ورفيعة في آن معا .....
واكيد المسافات تختصر حد الاختزال في بهاء مثل هذه الكلمات التي بقيت وستبقي خالدة
اللهم ارحمهم جميعا ....
الاعزاء راشد والجمل مرور رشيق وانيق وصاحب البوست الغايب ليهو زمن اخونا عبد الرحمن محجوب نقول ليك وين يا غالى الحروف , واللهم ارحم الراحل المقيم مصطفى سند
أكتب لي يا غالي الحروف
واحكي لي ياما الدنيا نوره وفرحتها
صارت بلاك غيمة شتاء
تنسج طيوف وتجيب طيوف
والشوق جدار بيناتنا يحجب بهجتها
يا سكة الزول البعيد يا حليله لما اتوارا غاب
خليته يمشي وفي العيون دمعات الم ودمعات عذاب
أتمني وعده يكون حقيقة وعهده ما خدعة سراب
أتمني في لهفة محب شال الصبر لما الصبر في قلبه داب
ارحل قطار ويعود قطار
وأصبح الليل الغريب طلت نهار ويجيني منك إنا بس خطاب
اكتب لي حتي الناس تقيف لما يفوته أقول اسلم للجميع
خايف يبين خاطري الكسيح ارجع براي اشقي الدموع
قلب سقاك موسم حنان موسم فرح موسم ربيع
ياريت تشوف انا كلما تنعس شموع بوقد شموع وأفضل أتوه عبر البلاد
يا رب متين وقت الرجوع

اكتب لي خلي النار تموت والهم يفوت
انا غير حروفك افقد الدنيا وأضيع
عاطف عكود

الرجوع الى أعلى الصفحة اذهب الى الأسفل

رد: (بعض من أجمل ما سمعت)

مُساهمة من طرف عاطف عكود في الثلاثاء 02 فبراير 2010, 04:10

mhmdaljamal كتب:
اتصل بي اليوم الاخ بابكر يوسف ووعدني بالكتابة قريبا ...وكذلك الاخ كمال الخواض توقعوه قريبا
حبيبنا الجمل والله خبر يفرح بجد انا حاولت معاهم وفشلت , انت واصل معاهم وليك البياض
ودام التواصل
عاطف عكود

الرجوع الى أعلى الصفحة اذهب الى الأسفل

رد: (بعض من أجمل ما سمعت)

مُساهمة من طرف خالد عبدالحميد في الخميس 04 فبراير 2010, 10:30

عاطف عكود كتب:
mhmdaljamal كتب:
اتصل بي اليوم الاخ بابكر يوسف ووعدني بالكتابة قريبا ...وكذلك الاخ كمال الخواض توقعوه قريبا
حبيبنا الجمل والله خبر يفرح بجد انا حاولت معاهم وفشلت , انت واصل معاهم وليك البياض
ودام التواصل
عاطف عكود
غايتو تجدونا فى انتظار كمال الخواض ،،، اما( وعد) بابكر يوسف ؟؟؟؟!!والله يالجمل فعاوز ليهو دفرة ،،،لانو اتصل بى بعد ما اتصل بيك ،او صدف انو انا اتصلت بيهو،،،وحبيبنا بووكو زاغ تانى من موضوع الكتابة،،وقال مٌركز فى التلفونات رغم الوعد
لكم اجمعين بحار مودة
*** عبدالرحمن محجوب ،،، يا سيد البوست ،،،وين انت
فتحت بوست بهذا الجمال ومن ديك وعييييك
نعوووود

الرجوع الى أعلى الصفحة اذهب الى الأسفل

رد: (بعض من أجمل ما سمعت)

مُساهمة من طرف محمد الجمل في الخميس 04 فبراير 2010, 13:04

*** عبدالرحمن محجوب ،،، يا سيد البوست ،،،وين انت
فتحت بوست بهذا الجمال ومن ديك وعييييك
نعوووود
كما قلت يا خالد اين هذا الرجل ؟

الرجوع الى أعلى الصفحة اذهب الى الأسفل

رد: (بعض من أجمل ما سمعت)

مُساهمة من طرف خالد عبدالحميد في الإثنين 03 مايو 2010, 08:04

mhmdaljamal كتب:*** عبدالرحمن محجوب ،،، يا سيد البوست ،،،وين انت
فتحت بوست بهذا الجمال ومن ديك وعييييك
نعوووود
كما قلت يا خالد اين هذا الرجل ؟
ولازال السؤال واقف لام ألف؟؟؟؟؟؟؟؟؟؟؟؟؟؟؟؟؟؟؟؟
وين اديبنا الفنان عبدالرحمن محجوب يوسف
وصّلوا عنّا السؤال مشكورين

الرجوع الى أعلى الصفحة اذهب الى الأسفل

رد: (بعض من أجمل ما سمعت)

مُساهمة من طرف عبدالرحمن محجوب يوسف في الإثنين 10 مايو 2010, 02:04

سلامات لكل المنتدين بدون فرز والشكر لكل من سال عنى0 الشوق للمنتدى ولكل المنتدين(وقت الحنين يكتر يفيض*ما ليهو قيف غير ضفتيك) انها تلاهى الحياة من مرفئ لى مرفئ اكان اشواقنا يوم ترسى ونعود للتواصل فى الاجازه قريبا ان شا الله

الرجوع الى أعلى الصفحة اذهب الى الأسفل

رد: (بعض من أجمل ما سمعت)

مُساهمة من طرف عاطف عكود في الثلاثاء 11 مايو 2010, 02:33

عبدالرحمن محجوب يوسف كتب:سلامات لكل المنتدين بدون فرز والشكر لكل من سال عنى0 الشوق للمنتدى ولكل المنتدين(وقت الحنين يكتر يفيض*ما ليهو قيف غير ضفتيك) انها تلاهى الحياة من مرفئ لى مرفئ اكان اشواقنا يوم ترسى ونعود للتواصل فى الاجازه قريبا ان شا الله
الرائع عبدالرحمن محجوب سلامات والشوق بحر وفى انتظار الاجازة ووقت الرجوع لتواصل الابداع , وتانى مصطفى سند
ياريت تشوف انا كلما تنعس شموع بوقد شموع وأفضل أتوه عبر البلاد
يا رب متين وقت الرجوع
ودام التواصل
عاطف عكود

الرجوع الى أعلى الصفحة اذهب الى الأسفل

رد: (بعض من أجمل ما سمعت)

مُساهمة من طرف خالد عبدالحميد في السبت 29 مايو 2010, 09:45

الرشيد شمس الدين عبدالله كتب:وتناقلوا النبأ الأليم على بريد الشمس فى كل المدينة .........
هكذا كتب العزيز الرشيد،،فى مكان اخر ،،،
طاب لى اعجابا ببلاغة التعبير ورشاقته وقوة هذه العبارة الساطعة انو اجيبها لهذا البوست لانو تتوافق تماما فى تقديرى مع عنوان البوست ،،،لك الف ود رشدى وانت تنثر الدرر اينما طقطق كى بوردك
وكسرة: لازلنا فى انتظار سيد البوست؟؟

الرجوع الى أعلى الصفحة اذهب الى الأسفل

رد: (بعض من أجمل ما سمعت)

مُساهمة من طرف عبدالرحمن محجوب يوسف في الأربعاء 17 نوفمبر 2010, 00:19

سلامات وبعد التحايا بالعيد السعيد أُحمل كتابي هذا اشواقي الحاره للمنتدي واهله الكرام من ميناء نيو منقلور بالهندواتمني للجميع افضل الامنيات.وصلني من جدي (خالي لأمي) الأستاذ يحي العوض, مقالاً" بعنوان (مناحة الصقيع) يدعو فيه للمشاركه بالتوثيق عن الهجره والاغتراب غير الطوعي,رايت ان اطرحه هنالانه اعجبني اولا وثانيا لمن اراد التواصل معه, ودمتم.....مناحة الصقيع : رواد أول انفصال من السودان ...!!

بقلم : يحيى العوض

" اليأس بالاكراه " , يصلح عنوانا لاستفتاء يستقصى أسباب أول انفصال للسودانيين من وطنهم الأم , أكثر من مليون سودانى فى المنافى اقتلعوا من الوطن , (لا يشمل هذا الاحصاء المغتربين فى دول الخليج ومصر والدول الأخرى) , منذ اعصار العواصف النميرية, وامتدادها مشبعة بسموم القهر الترابية ,استوطنوا دول أخرى , بعضها , لايعترف بالجنسية المزدوجة ,يزورون الوطن الأم بتأشيرة دخول !
ويقول الاستاذ ابراهيم سعيد طه : فى المنافى نخفى متاعبنا وآلامنا وآهاتنا دوما كأنها ثروة قومية .!

" نيرانهم جامحة الأوار " هذا قدر جيل من السودانيين , الوجدان هو المحرك لحياتهم قبل العقل , كما يقول مظفر النواب :

سبحانك كل الأشياء رضيت سوى الذل ..
وان يوضع قلبى فى قفص فى بيت السلطان .
وقنعت يكون نصيبى من الدنيا كنصيب الطير .
ولكن سبحانك حتى الطير لها أوطان ..
وتعود اليها فانا مازلت أطير !
ويعزينا مظفر النواب بشعارات تلك الايام , فى سباقنا الذى لايهدأ , املا فى نقل الشعلة المتقدة لجيل الابناء وهم فى مهدهم :

وتحرك سبابتك المهمومة فى فم طفلك ...
تسمع لثغته الناعمة الوردية ....
تبحث عن أول سن تجرح ...
من أجل قضية ..
ويعضك عضات ناعمة ..
يضحك فى وجهك...
يفهم انك ياعبد الله ...
تدربه الدرس الأول للثوار..!

ودفع جيل رواد الانفصال الأول ثمنا باهظا , اكرهوا عليه , تجسده الأستاذة رقية وراق , فى مناحة الصقيع , بعد انتزاعها من خدرها الدافىء فى السودان الى شتاء كندا عام 1994م :

كعادتها كانت الشوارع
هذا الصباح ثلجية ..
وبياضها الشاسع ..
يقطع خميرة الدفء عن عجينة الطقس الغريب .....
فى برودة الدرب الطويل ..
ولانهائية شكل الغياب ..
فاجأنى ظمأ عميق .
الى قطرة من رحيق البلاد..
ورغبة فى الرحيل ..
هدأت من ايقاع مشيتى العجول ..
وهتفت ملء الساحة الجليدية ..
"ووب ياناس على "!
وألف سجم يسربل فمى ..
الثلج كالنى والرماد ..
أرخيت الآذان وانتظرت ..
"ما رد " فجيعتى أحد ..
لا جار "تلب" عبر الحائط .!
عادت يداى تستدفئان بالجيوب ..
وقالت دمعة قبل أن تتجمد ..
ياغريبة الديار..
ما أعظم خسارتك ..!

لم يكن لرقية وراق , وغيرها من المضطرين لمغادرة الوطن الا تحمل ما فوق طاقاتهم , بعد مقصلة الفصل من الوظيفة للصالح العام ومحاكم تفتيش الانتماءات الدينية والعقائدية , منهم من" ضاع فى المطارات مثل الحقائب " بعضهم نهشته الكلاب البوليسية عند الحدود وهو يحاول الدخول , ومنهم من امضى سنوات فى معسكرات الايواء , ومنهم الطبيب والمهندس الذين اضطروا للعمل فى المطاعم وحراسة العقارات .أحد اصدقائى وكان محاميا مرموقا فى السودان اضطر للعمل فى مطعم من سلسلة ماكدونالدز بالنرويج وكتب لوالده خطابا به عنوانه, وبعث الوالد برد عاجل يهنىء ابنه بوظيفته المرموقة , حسبه مستشارا قانونيا لماكدونالدز .! ويرسم لنا الاستاذ محمود أمين صديق, صورة صادقة لمعاناة ذلك الجيل عبر صحيفة " الراى الآخر" التى اصدرها الدكتور النور حمد فى امريكا عام 1996 :
هل كتب علينا , نحن السودانيين , تيه اليهود أم تيه ابناء عمومتهم الفلسطينيين , أم هو مكتوب علينا أن نمر بكل التجارب التى مرت بها الشعوب قبلنا , فقط ان نمر بها , آخر الناس كالعادة , كما يتهمنا بعضهم ! اننا نجرى جرى خيول الكاوبويات وراء رزق
تقطع أوصاله ادارة الضرائب الامريكية وفواتير لا ينقطع سيلها , حتى انك تردد وانت تفتح صندوق البريد صباحا " محمد معانا لا تغشانا " ! بعضنا وصل المكسيك واستراليا واحد اخوانا من الجزيرة ودمدنى استقر به المقام فى جزيرة "غوام " فى قلب المحيط الاطلنطى ! وهناك اسماء لعمارات واحياء سكنية تحمل اسماء سودانية قحة مثل امدرمان وهى عمارة سكنية فى ولاية ميرلاند , والحلة وديم لطفى فى تكساس وفلادلفيا ونيويورك . وتنشر مجلة " حوار" , وهى ايضا من مطبوعات , الجالية السودانية بالولايات المتحدة فى عددها بتاريخ يناير 1997 , مقالا لكاتية فضلت التوقيع باسم " فاطنة بنت البلد " جاء فيه : نحن من حملنا البذرة الصالحة بداخلنا , ولم نجد التربة الصالحة لزراعتها ..مأساتنا تكمن فى تلك العزة المتوهجة بداخلنا . تجرعناها منذ نعومة أظافرنا , ولم نستطع ان نعيش بدونها ووقفنا بها امام الظلام والعدم , فعشنا روحا أبدية , أمسك بعضنا المكنسة , وكانت هناك فئة صامتة آثرت الصمت , وعندما لم تجد ما تقوله , فقد ذبل ومات شىء عزيز بداخلها ,فضلت الحل بين عجلات قطارات فى سرعة الصوت وفى أعماق قنوات امستردام العميقة , أو من علو ناطحات سحب نيويورك المتلألئة ! .. ثلاث اسر سودانية وصلت الى " هاشتا " فى اقصى شمال النرويج عند آخر بقعة تحد القطب الشمالى , فصول السنة مقسمة , ستة أشهر نهار متصل لا تغرب شمسها , وعليك ان تضع ستائر حالكة السواد لتتمكن من النوم , وستة أشهر فى ليل مستمر لاتعرف ضوء الشمس, فى الصيف يصلون جميع الاوقات والشمس فى كبد السماء !
وقال لى الصديق بكرى حسن , الذى كان مع اسرته فى "هاشتا " .. هل تصدق , كنا نتدفا باغنية الفنان كمال ترباس :
ظروف وبتعدى
طبيعة الدنيا زى الموج
تجيب وتودى..
ماتهتموا .. أصل الناس
حياتا ظروف..
وفى الدنيا بنلاقى
الفرح والخوف ..!
ورغم ذلك , غربة ابكتك يتمناها غيرك ..!
ويحكى لى صديق يعمل فى مدرسة للجالية السودانية , أنه ذهل عندما سأل تلاميذه فى الفصل الثانى عن المهنة التى يتطلعون اليها فى مستقبل ايامهم , فأجابه تلميذ يافع , بان يعمل لاجئا .!
لقد تأصلت فكرة الهجرة بين سكان العالم الثالث لاسباب سياسية أو اقتصادية , ورفض الاستكانة , لقهر سياسى او ظروف معيشية قاهرة , ويقول صلاح عبد الصبور فى رائعته , مأساة الحلاج :
ليس الفقر هو الجوع الى اللقمة.
والعرى الى الكسوة..
الفقر هو استخدام الفقر..
لاذلال الروح ..!
yahyaalawad@hotmail.com

الرجوع الى أعلى الصفحة اذهب الى الأسفل

رد: (بعض من أجمل ما سمعت)

مُساهمة من طرف عبد الرحمن الزين2 في الأربعاء 17 نوفمبر 2010, 04:34

اكثر من رائع..لك الشكر وكل عام وانتم جميعا بالف خير
عبد الرحمن

الرجوع الى أعلى الصفحة اذهب الى الأسفل

صفحة 2 من اصل 10 الصفحة السابقة  1, 2, 3, 4, 5, 6, 7, 8, 9, 10  الصفحة التالية

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى