يا حليل أيام زمان

استعرض الموضوع السابق استعرض الموضوع التالي اذهب الى الأسفل

يا حليل أيام زمان

مُساهمة من طرف Capt A.M.Alinto في الأحد 27 ديسمبر 2009, 14:09

يا حليل زمان وايام زمان

((علي بالطلاق ما كان كتب الحبة)) معقول يا جماعة ؟؟؟؟ المنطق بقول نسبة الجمال زادت في السودان !!زايد رياح الموضة والشياكة والحلاوة والطلاوة المصاحبة لي طلة الجكس زايد الانفتاح والاختلاط والجامعات والمكاتب !!!واتحول النقاش لي جدل رجالي جماعي وكويس انو الحافلة كانت تخلو من الجكس الإ من خالتين تلاتة ممن تجاوزن الخمسين والستين.. واكد الكل انو الشعراء لو شافو بنات الزمن ده ما كانو حركو فيهم ساااااااكن ولا كنا سمعنا بي اغاني الحقيبة من اصلو!!...وشاركنا واحد من جيل الحقيبة كان راكب ورانا واول ما سمع طرف الموضوع قام و استند علي عصايتو وبرقت عيونو بي شقاوة توحي انو عمك كان في شبابو راس هوس كبير وقال لي يا اولادى زمان النسوان كانو جواهر كانو درر المرة تنشف ريقك عشان تسمع ((نغيم فاها)) المرة كانت زي هلال العيد تطلع روحك عشان تلمح صورتها المرة كانت غاااااااااالية لا بتتلحق لا بتتهبش النسوان كانن في الخدور يزينن الحياء وكاسياهم الحشمة الواحدة حتي لو الله رضي عليك واخدتها بالحلال تفضل مجرياك وراها سنة عشان تتكلم معاك او تسمعك صوتها وتشحدها شحدة عشان تقول ليك اسمك وكل يوم تقول ليك خلاص بقول ليك اسمك بكرة ويجي الصباح وتقول ليك بخجل خلي بالليل ويجي الليل وتقول ليك اطفي النور وغمض عيونك وقبل علي الحيطة وبعد ده كلو تقول ليك الحرف الاول من اسمك وتقول ليك الباقي بكرة وتفضل علي الحال ده زمنننننننن لمن روحك تشحتف وعينك تطلع وعقلك يشت ويوم تقول ليك اسمك ده يوم عيدك مش زي هسة من اول يوم تنبح بي اسمك تهاتي وتنادي الحلة كلها تسمع لا طعم لا ريحة وانت ينادوك كأنو ده مااسمك!! ..النسوان يا ولدي كان فيهن جمال غريب وبريق عجيب انقرض بعوامل القهارة الجات لبنات الزمن ده الواحدة فيهن بقت تخوف الراجل من قوة عينها الواحدة تقعد تتونس مع الراجل كانها واحد صاحبو كلام يخوف ويكلب شعرة جلدك وقالو بقن يخمسن مع الرجال وواحدات قالو لي بشيشن عليك الله الناقصن شنو غير العمة والعصاية !!! اصلا شيطان الشعر شرد من قوتن ومساختن وكترتن والله ود بتي بحكي لي كيف البنات معزبنو وكيف الولد بتزاوق منهن زي ود الموية لا نفعت دبلة معاهن ولا نفعت فقارة ولا صرت وش يا كافي البلاء النسوان بقن ((ويكة ساري)) بس قولو لي حريم متل ديل يكتبو فيهن شنو؟؟؟يعني معقول يقولو فيهن(( حاول يخفي نفسو وهل يخفي القمر في سماهو؟؟؟)) ولأ يقولو ليهن(( يومي الاشوفك يبقي عيد والدنيا تبقي معيدة )) ولا (( مين لي سماك يطول ما بطولك اللمسان معناك شرحو يطول والله يا انسان)) ديل بقن هن البغنن للرجال وبقولوا ولأ استغفر الله ما في داعي. ديل بلومن الرجال وبقولن ليهن ((ياالبتبخل بالزيارة وياالبتنضم بالاشارة)) يا كافي البلاء في زمنا النسوان الكانن مبكمات وبنضمن بالاشارة ويشاغلن من بعيد لبعيد هسه انعكست الاية الرجال بقو يأشرو والنسوان يصفرو...ديل نسوان علي بالطلاق الواحدة فيهن تعكلت فيك الا بس يحلك منها الحلة بله ديل زي ما قالو اهلنا آخر الزمن يجيكم ((زمن الشنكل الراجل ينفض والمرة تتعنكل)) قال شعر وحقيبة ديل لو شافن المتنبي حا يبقي سواق ركشة!!!
وشاركنا شاب وجيه يجلس في الكنبة الاخيرة, تقريبا في اواخر العشرينيات بس يبدو عليو الالتزام والاحترام وقال ليهو صدقت يا عم الحاج والله انا يوماتي بواجه مشاكل من النوع ده رغم اني متزوج وبقول ليهم كده بس قالو لي طيب مالو((راجل المرة حلو حلا)) ديل يا عمي الحاج ما بنفع معاهم الإ ندّس في البيوت ونخليهم براهم في الشارع الشحدة بقت علني والختف علي عينك يا تاجر الواحدة تقول ليك بس جيب المأذون انا مجهزة كل شئ من البيت لي الزيت أها يا عمي ديل الشعراء يعملو بيهم شنو؟؟؟وشاركتنا خالة جالسة بكل وقار وزايداها الشلوخ رزانة وقالت ليو صدقت يا ود بطني ديل اريتن بنات اليابا والتابا القاهرات امات عينن قوية وسنن ملوية ديل اريتن بالتقصهن وتكسر رقابن فايرات زي الكركار الفي النار.. يسكن بالموبايلات والمس كولات والمسجات ولمن تغلبن ام غلاب يجن يدقن الباب عديل لا خوف لا خجل لا وليان لا أهل ..جنس ده يا ولدي في حجي جحا ما سمعنا بيهو ولا قايلين بنعيش لمن نشوف جنس ده!!!!مزنقات بالبناطلين زي المجبسات وزاردات السوست والمطلعنو اكتر من المغطنو وبعد ده كلو ما جايب ليهن مريسة تام زينو الرجال عافوهن ولا عبروهن يا كافي البلاء وحايدن المحن ..نقرن الشيب ولا جنا ولا تنا ..يعرسو ليهن شنو يا ولدي ديل متكشفات و مستعرضات كل زول حايم معرسن بي عيونو الجزمجي والمكوجي والمهندس والدكتور والضبان والباعوض كلو لامي فيهن..وود حشايا ده بقول ما كتبو فيهن شعر ديل يا ولدي بقولن للرجال ((انا جيتو جاريةعريانة)) يطرشني زي الغنا ده ما سمعت بيهو د يل مسخنها عديل وجابن لامنا حواء الكلام!!وفي الاثناء دي صدح ياسر تمتام : ((طاهرين عفاف يا حبيبي نخلو من قذر...الخ)) وتحول مجري الحديث للحب زمان والحب هسه وكيف كان الحب طاهر وعفيف ولذيذ وبرضو اتحفنا عمنا الحاج بروائع الحب زمان وقال لنا ما لم يقله مالك في الخمرواكيد كانت الغلبة لحب زمان وبنات زمان وجمال زمان وطلعنا نحن فشوش ووصلت لمحطة بيتنا واول ما نزلت من الحافلة لقيت واحدة مسخوتة في وشي وقالت لي ((الازرق ده الإ في السماء)) في اشارة لي لون قميصي ابتسمت ولسان حالي بقول الله يرحمك يا سيد ويا عبيد ويا خليل فرح ويا كرومة وسرور ويا ايام زمان ونسوان زمان وبنات زمان وريدة زمان.

الرجوع الى أعلى الصفحة اذهب الى الأسفل

رد: يا حليل أيام زمان

مُساهمة من طرف mohmed habib في الأحد 27 ديسمبر 2009, 16:27

من طرف فيصل الجزار تحياتنا وفى شوق شديد وموضوع جميل وشيق ولسان الحال يقول ياحليل النتوت وعليك يالله واصلو الزمن غلاب وربنا يدينا الصحة

الرجوع الى أعلى الصفحة اذهب الى الأسفل

رد: يا حليل أيام زمان

مُساهمة من طرف راشد في الأحد 27 ديسمبر 2009, 18:00

الاخ العزيز كابتن النيتو...
شكرا حقيقي للموضوع المطروح واظنه قضية اجتماعية اكتر من انو طرح علي بوست ...ما اكتبه لا يمثل الا راي شخصي .......
تظل المراءة علي مر الدهور ذاك المخلوق الجميل الذي يحرك كوامن الرجل سوي كان عاشقا او شاعرا او قاص او كاتب عمود يومي او رجل امي لا يفك طلاسم الكتابة ...منذ بدء الخليقة والرجل يحب ويعشق المراءةبوسيلة اتصال تختلف كأداة وتتشابه كغاية ...قتل هابل اخاه وهذا نوع من نوع العشق ورمز القوة حينذاك كان هو اداة التعبير ...عشق ابونا ادم فخرج طوعا من الجنة وعشق عنتر فنطق شعرا وتبعه كثر في تلكم الحقبة ...و...و والامثلة كثيرة لا تعد ولا تحصي واذكر انه اول امس حرق شاب مصري نفسه امام شقة من يحب واظنك توافقني انه عاشق جدا حد الهوس ان يموت امام من يحب حرقا بالنار واظن هذا الحدث اقوي من كل شعر قيل....!!!!
عليه دعونا لا نظلم المراءة افتراءاً ... من يلعب الدور الاكبر في تغيير البسيطة تحت اقدام المراءة...؟.انه الرجل بلاشك....
إبان فترة الحقيبة كان الرجل لا يري المراءة الا بمحض صدفة (سوي كانت مصطنعة ام بتدبير الهي) ..فإذا ماراها تتفتق قريحته شعرا واحايين كثيرة يعبر تلعثما وصمتا ........
ولكن حتي لا اطيل عليك وعليهم ويدب خدر الملل لاطرافكم تظل لكل حقبة ولكن جيل ادواته في العشق ولكن بدون أـدني شك تظل المراءة جميلة علي مر الازمان والعصور ......
انا شخصيا اري المراءة ببنطلون جنز جميلة جدا وغيري يري المشلخة (111) في قمة الجمال و....و ....

الرجوع الى أعلى الصفحة اذهب الى الأسفل

رد: يا حليل أيام زمان

مُساهمة من طرف عبد الرحمن الزين2 في الأحد 27 ديسمبر 2009, 20:18

العزيز الن... اولا يا الف مليون مراحب بعودتك فلا تحرمنا -صديقي العزيز- من طلتك وطرقك لمثل الموضوع اعلاه...
تانيا احب ان ادلو بدلوي واقول رائي وللحقيقة والتاريخ هو راي كان يطرحه المرحوم كابتن قاسم- يرحمه الله رحمة واسعة...من رائ قاسم في ذلك الوقت -وان خالفته الراي -الا اني اعتقد بان هناك صواب لا يمكن نكرانه في وجهة نظره...فهو يعتقد ان سبب كل هذا التحول هو التحرر الاقتصادي لدي المراة..فقديما كانت المراة تعتمد علي الرجل في كل شئ لانها لم يتاح لها ان تتعلم وان نالت قسطا من التعليم فنادرا ما يسمح لها ان تعمل الا في حدود ضيقة وعندمايتزوج الرجل يتمني ويسال الله ان يجعل ذريته من البنين لانهم سيكونو عونا له مستقبلا اما اذا انجبت له زوجته البنات فلا فايدة ترجي وعليه ان يسرع بتزويج البنت حتي لا تكون عالة عليه ويتخلص من الصرف عليها وحتي يجد من يتزوجها لا بد ان يكون راسمالها عفتها وطهرها وسمعتها فان كانت سئية السمعه فلن تجد من يتزوجها وتبقي عالة عليه الا يتوفاها الله هذا اذا لم يقم بذبحها باسم الشرف والدين والتقاليد ولكن لو كانت تعتمد علي نفسها في معيشتها وربما معيشتهو هو واهل بيته فلن يسالها حتي اذا جاءت المنزل في منتصف الليل..وهنا يسقط قناع الدين والتقاليد والشرف الخ الخ لهذا تغيرت النظرة بل اقول عدنا الي الوضع الطبيعي....لا اود ان اطيل وقطعا لي عودة في ذات الموضوع ولكن لنترك الكي بورد لمشارك اخر..
محبتي
راخو

الرجوع الى أعلى الصفحة اذهب الى الأسفل

رد: يا حليل أيام زمان

مُساهمة من طرف عاطف عكود في الثلاثاء 29 ديسمبر 2009, 00:15

الن الغالى سلامات والله ......., وحمدالله على السلامة ...والبركة فى الشوفة
اطلالة قوية واسمع يا سيدى الشغلانية كلها ببساطة كدى ان كل شخص ذى ماشايف ينظر لها بمنظور مختلف وان اتفق الجميع على انو الزمن اختلف واختلفت معاه كتير من الاشياء والمعايير من عادات..... وتقاليد..... وشعر ......حتى الادب وقلتو !
والنظرية بتقول والمسؤلية على الراوى ان
المسافة =الزمن xالسرعة
فالمسافة وسعت وقبيل قلنا انو الزمن اختلف اما السرعة فحدث ولا حرج فهو عصر السرعة والسرعة اختلت فى كل شى حتى فى تسابق الحروف
وسؤال برىء ايهما اسرع حرف الفاء ام حرف الراء ؟
ففى جواب هذا السوال مربط الفرس !!!!!!
والجواب ان كل حرف منهم يسبق الاخر ويسرع فى المكان والزمان الغلط فاصبح المفروض هو المرفوض والمرفوض هو المفروض .
وكلو اصبح يسرع و يدور حول نفسو حتى اختلط الحابل بى .......الحابل زاتو !!!!!
والله المستعان
عاطف عكود

الرجوع الى أعلى الصفحة اذهب الى الأسفل

رد: يا حليل أيام زمان

مُساهمة من طرف عاطف عكود في الأربعاء 30 ديسمبر 2009, 03:59

Capt A.M.Alinto كتب:[b][u]

انا كنت ومازلت من اكتر الناس حبا" وعشقا" لاغاني الحقيبة ..وكلما اسمعها احس اني بسمعها لاول مرة ودايما كنت بستغرب في الشعراء ديل جابو وصف الجن ده من وين!!وبستغرب في المخيلة العجيبة دي. وبسأل نفسي معقول النسوان ديل بشر ولأ صحي من حور الجنان ؟؟ومعقول الجمال ده كلو كان في السودان؟؟؟ .واكيد في ناس كتار زي كدة ومن ضمنهم صديقي العزيز اللاقيتو في حافلة عامة وكان صوت ياسر تمتام يصدح بأجمل ما قيل في الحب والجمال والنساء,,والتفت لي صاحبي وانا في قمة النشوة وهو ما أقل مني لو ما أكتروقلت ليو بالله سيد عبد العزيز ده لو كان شاف الجكس الحايم ده كان كتب شنو؟؟ورد علي صاحبي وشاركنا جارنا في الكرسي الورانا
[/color][/color][/font][b][b]((علي][face=Arial][b]((علي][b]((علي][face=Arial][b]((علي]
[right]

العزيز عبدالرحمن (راخو )والاخوان الاعزاء للمرة التانية بركات شيخنا الن تبين
كنت عايز اشتكى ليكم حالو بعد رجوعوا من ارض الوطن وهو كلبة شعرو مجلدة (اقصد شعرة جلدو مكلبة )
وشابكنا غلط ولا ما صاح ؟؟؟؟
(وعلى قول ندى القلعة يبقى الغلط !!!)
والازرق الفى السماء !!!!!
ويا لابس البمبى لشرحبيل !!!!!
وقال عمك بتاع الحافلة كان راس هوس .............
وحاجات كدى
على العموم اول ما عملت اقتباس لموضوع ياحليل ايام زمان بانت لى ترويسة الموضوع اعلاة والتى كانت مخفية كيف ؟ وين ؟ الله اعلم وجربوا انتو من عندكم ..
ومدد يا شيخ الن
ومين لي سماك يطول ما بطولك اللمسان معناك شرحو يطول والله يا انسان
عاطف عكود
[/font">
[/face]

الرجوع الى أعلى الصفحة اذهب الى الأسفل

رد: يا حليل أيام زمان

مُساهمة من طرف احمد محمد احمد في الخميس 31 ديسمبر 2009, 05:13

عاطف عكود كتب: الشغلانية كلها ببساطة كدى ان كل شخص ذى ماشايف ينظر لها بمنظور مختلف وان اتفق الجميع على انو الزمن اختلف واختلفت معاه كتير من الاشياء والمعايير من عادات..... وتقاليد..... وشعر ......حتى الادب وقلتو !
عاطف عكود

التحيات لشيخنا الن.

احسنت القول و ابنت يا عاطف فالنظرة للمراة و الصاح و الغلط متغيرات (variables) - كما يدعوه اهل الرياضيات - يتغير بمؤثرات المكان و الزمان.

أما انت يا كابيتانو فكلامك دة ما كلام زول عايز يترشح .

الرجوع الى أعلى الصفحة اذهب الى الأسفل

رد: يا حليل أيام زمان

مُساهمة من طرف محمد الجمل في الإثنين 08 فبراير 2010, 14:57

رسالة الي كابتن النتو

رجاء رجاء واصل وما تعمل ميت بالشغل

الرجوع الى أعلى الصفحة اذهب الى الأسفل

رد: يا حليل أيام زمان

مُساهمة من طرف عاطف عكود في الأربعاء 06 مارس 2013, 22:13

عاطف عكود كتب:
الن الغالى سلامات والله ......., وحمدالله على السلامة ...والبركة فى الشوفة
اطلالة قوية واسمع يا سيدى الشغلانية كلها ببساطة كدى ان كل شخص ذى ماشايف ينظر لها بمنظور مختلف وان اتفق الجميع على انو الزمن اختلف واختلفت معاه كتير من الاشياء والمعايير من عادات..... وتقاليد..... وشعر ......حتى الادب وقلتو !
والنظرية بتقول والمسؤلية على الراوى ان
المسافة =الزمن xالسرعة
فالمسافة وسعت وقبيل قلنا انو الزمن اختلف اما السرعة فحدث ولا حرج فهو عصر السرعة والسرعة اختلت فى كل شى حتى فى تسابق الحروف
وسؤال برىء ايهما اسرع حرف الفاء ام حرف الراء ؟
ففى جواب هذا السوال مربط الفرس !!!!!!
والجواب ان كل حرف منهم يسبق الاخر ويسرع فى المكان والزمان الغلط فاصبح المفروض هو المرفوض والمرفوض هو المفروض .
وكلو اصبح يسرع و يدور حول نفسو حتى اختلط الحابل بى .......الحابل زاتو !!!!!
والله المستعان
عاطف عكود
الف مليون مرحب بالحبيب النتو او ألن كما يحلو له فقد رجع اليوم من شمبات بعد أجازه قضاها بين الاهل والأحباب وأبقى داخل والفوق دى مداخله كانت بعد عودتك من أجازه فى 2009 وتانى شوف الزمن والمسافة والسرعة وفى انتظار الكثير المثير منك . وتانى حمد الله على السلامه(حبيبنا الجمل آها النتو وصل)
عاطف عكود

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى