حكا يا ت من زمن سودانلاين الجميل

صفحة 5 من اصل 27 الصفحة السابقة  1, 2, 3, 4, 5, 6 ... 16 ... 27  الصفحة التالية

استعرض الموضوع السابق استعرض الموضوع التالي اذهب الى الأسفل

رد: حكا يا ت من زمن سودانلاين الجميل

مُساهمة من طرف ود كرار في السبت 01 نوفمبر 2008, 03:09

الكود:
[b]  الف مبروك للدكتورة أمنة[/b]

الرجوع الى أعلى الصفحة اذهب الى الأسفل

حكايات من زمن سودانلاين الجميل

مُساهمة من طرف الرشيد شمس الدين عبدالله في الثلاثاء 04 نوفمبر 2008, 22:16

أرحب كثير الترحيب بالتسجيل الأحدث فى المنتدى للأخ العزيز عبد الله بن عوف ( تماما مثلما نكتب عبالرحمن بن عوف ) ... والأخ إبن عوف غنى عن التعريف ...نكرر الترحاب به وفى إنتظار مساهماته الفاعلة ...
وعلى ذكر أخينا إبن عوف , أذكر قبل سنوات حينما أصبح إبن عوف كبيرا للمهندسين لأول مرة فى إحدى بواخر سودانلاين ( ربما كانت الأبيض ) وقد حضرت الباخرة لميناء الشارقة فى أولى رحلاته عليها ك (كابو) , ذهبت لزيارة الباخرة فى ميناء الشارقة للتحية وللمباركة لإبن عوف . وبعد القيام بهذا الواجب سألت إبن عوف هازئا :-
( هسى ياإبن عوف صحى , صحى بقيت كابو ؟ ووصلت الباخرة دى براك لحدى هنا ؟ ) ... رد على بسرعة :-
( أقول ليك وصلتها ASTERN كان ما عجبك .... عاملين لينا فيها المسألة صعبة مع إنها أسهل مما كنا نتصور ) ضحكنا من القلب وباركت له وخرجت ...
وعلى ذكر أخينا إبن عوف , فقد علمت من بعض المصادر الموثوقة ( كابتن أحمد خضر ) أن إبن عوف وأبو جزمة كانوا شهودا فى إستتابة أخينا أمين قيلى حينما تمت محاولة تكفيره رسميا فى إحدى المرات فى هذا الزمن الأهتم ... أضحكنى ذلك لدرجة البكاء ليس لإيمان أمين قيلى الزائد ولكن لأن الشاهدين فى نظرى , ليسا أكثر إيمانا منه !
أرجو صادقا من إبن عوف أن يحكى لنا القصة لأن الغناء سمح من خشم سيدو ...ألف مرحب بإبن عوف ..... بيتك ومطرحك .... لكم الود وليدم مابيننا ...

الرشيد شمس الدين

الرجوع الى أعلى الصفحة اذهب الى الأسفل

رد: حكا يا ت من زمن سودانلاين الجميل

مُساهمة من طرف الرشيد شمس الدين عبدالله في الإثنين 10 نوفمبر 2008, 17:25

لا حول ولا قوة إلا بالله ... الموت حق والحياة باطلة ... عادة ما نرحب بالزملاء الذين يسجلون فى المندى ولكن بكل أسف تسجل اليوم ( التافه .. محمد إدريس ) .. لا أهلا به ولا سهلا ... وكله منك يا عزيزنا خالد , أرسلت له الرابط لتعلم المشاركة بالعربى , ولأن طبع اللئام يغلب التطبع , فقد عكف ماسورة على التعلم ( كأنه ممتحن ) حتى لقد أجاد فى يومين فقط وكالعادة فقد بدأ مناكفاته بى فكتب :-

( وبلاخص الدكتوره الكبيره , التعبت وعلمت وساهرت وجبدته بالشطاره الشديده. و والله
كمان صرفت ) ...

المهم حمدلله على السلامة يا عبدوس عودتك بعد زيارة السودان , وبل راسك يا صديقى فقاشورة بدأ وأنت تعلم طبع (المشاطات ) ما بينفع معاهو ( كسير تلج ) , وياعزيزنا حاتم ..ألحقنا وأنجدنا ... أو كما ذكر خالد ...
لكم الود وليدم مابيننا ...

الرشيد شمس الدين

الرجوع الى أعلى الصفحة اذهب الى الأسفل

رد: حكا يا ت من زمن سودانلاين الجميل

مُساهمة من طرف عبد الرحمن الزين في الثلاثاء 11 نوفمبر 2008, 04:08

عارف يا رشدي برانا بنسوي في روحنا لكن ابن...... بعرف دايما كيف ياكل الجو واسالني انا وصاحبو العزيز كابتن النعيم
تخريمه ويا خالد اعمل حسابك
قابلني احد البحاره بعد ان نزلته من النيل البيض في اجازه في ايطاليا وحل مكاني كابتن النعيم وقال لي والله فقدناك لكن كابتن الفاتح ما قاعد يقصر معانا- الفاتح الوكت داك كان سكند
=
المعروف انو لمن تلاقي زول عندك معاهو مصلحه اول شي لازم تعرف تخش عليهو كيف وكتير جدا بحكي مع توحه وبندرش- الفاتح استنبط- حلوة استنبط دي - تعبير جميل قال لي يعني تاخد بوشو - ولمن نسوا البحر بوشو يعني بوش الحبل - وفسر الماء بعد جهد بالماء- ما علينا البحار قال لي اول ما نزلته من الباخره ماسوره بقي الكابتن قلته ليه كيف قال لي ياخي ده اخد بوش كابتن النعيم في دقيقه واحده
تقول لي قال
غايتو اعملوا حسابكم قال ما بعرف يكتب عربي قال
مودتي بلا حدود


عدل سابقا من قبل عبد الرحمن الزين في الثلاثاء 11 نوفمبر 2008, 04:12 عدل 1 مرات (السبب : اضافه)

الرجوع الى أعلى الصفحة اذهب الى الأسفل

رد: حكا يا ت من زمن سودانلاين الجميل

مُساهمة من طرف الرشيد شمس الدين عبدالله في الثلاثاء 11 نوفمبر 2008, 15:37

أهلا بيك وسهلا وحمدالله على السلامة يا أبدوس .... غايتو الله يسترنا ساكت رغم إنه خالد طمنا إنه مادام حاتم موجود مافى خوف لكن المشكلة إنه حاتم مختفى بإمتياز ويمكن يكون حرد لينا المنتدى ذاتو ... غايتو لم يبقى لنا فى هذه المصيبة إلا الدعاء :- اللهم إنا لا نسألك رد القضاء ولكن نسألك اللطف فيه يارب ...
وعلى ذكر موضوع ماسورة مع كابتن النعيم , أذكر جيدا بعدما قام كابتن النعيم بتغيير أبدوس فى النيل الأبيض أن التقيت ماسورة فى بورتسودان وسألته :- عامل كيف مع النعيم ؟ رد على بسرعة :-
( يالرشيد إنت ما نصيح ...أنا قدرت اخد بوش عبدالرحمن الزين , بيغلبنى النعيم ؟ والله النعيم دا ما أخد منى أكثر من دقيقة واحدة وهسع هو ناوى ينزل ويسلمنى لكن أنا بحاول أقنعه يستمر شوية ) ...
وبرضو تقولى ما بيعرف يكتب بالعربى !!! هسع عليك الله الكتبو فى يوم واحد يمين وشمال دا حال زول بيتعلم فى الكتابة يادوبو ؟ لكم الود وليدم ما بيننا ...

الرشيد شمس الدين

الرجوع الى أعلى الصفحة اذهب الى الأسفل

رد: حكا يا ت من زمن سودانلاين الجميل

مُساهمة من طرف الرشيد شمس الدين عبدالله في الأربعاء 12 نوفمبر 2008, 22:31

شرفنا قبل أيام بالزيارة حبيبنا عبد العظيم حسب الرسول ( كجة ياعجيب ) ولقد قضينا معه أمسية من أجمل الأماسى , أخونا أحمد قرين والعبد قريش ووائل إبن عبدالعظيم الذى شب عن الطوق فتى نديا , وشخصى ... إستعدنا فى تلك الليلة ماضى الذكريات الجميلة وضحكنا كما لم نضحك لفترة طويلة , ولقد غسلنا فى تلك الأمسية الجميلة كل رهق سنوات الغربة القاسية ... وهاأنذا أشرككم معى فى بعض ذكريات زمن سودانلاين الجميل ...
طبعا العبد قريش عنده عقدة متأصلة لأنه عمل ضابط تدريب ( كاديت ) فى سودانلاين لمدة عشرة سنوات كاملة وذلك بسبب العمالة الزائدة حينها وكان حينما يذهب فى الإجازات للأبيض , فيعرف أهله وأصدقاؤه أنه ضابط تدريب ويسألونه ماذا تعنى ضابط تدريب ؟ يرد عليهم بدون تردد :- ( ضابط تدريب معناها إنى أقوم بتدريب الضباط كلهم ). تذكرنا أيضا رحلة الباخرة نيالا المشهورة لروسيا بداية عام تمانين وقصة المرحوم مامون ( إمبريك ) الذى كان ضابطا ثانيا ومسئولا عن الحسابات حينها وتلك سنحكيها فى المرة القادمة - إن مد الله فى الأجال - !

الرشيد شمس الدين

الرجوع الى أعلى الصفحة اذهب الى الأسفل

رد: حكا يا ت من زمن سودانلاين الجميل

مُساهمة من طرف عبد الرحمن الزين في الخميس 13 نوفمبر 2008, 04:02

حاسدكم عديل يا رشدي وانته بالذات كلهم بجوا عندك ربنا يغتيك ويحفظك من شر الحساد بس انا عيني بارده وبمناسبة ضابط التدريب او مهندس الندريب طبعا كانت معانا شلة ما لها عدد في دنقلا اظرفهم اخونا الباشمهندس محمد حبيب وكان ليه طاشر سنه اسستنت وفي صباح عيد الاضحي وكنا في بورتسودان قلته ليه يا محمد كلو سنه وانته طيب والقابله مهندس تالت قال لي بسرعه عليك الله يا كابتن اتمني لي حاجه ممكن تتحقق
تحياتي

الرجوع الى أعلى الصفحة اذهب الى الأسفل

رد: حكا يا ت من زمن سودانلاين الجميل

مُساهمة من طرف الرشيد شمس الدين عبدالله في الخميس 13 نوفمبر 2008, 22:05

شكرا للمداخلة يا عبدوس وواضح إنه أخر رد ودهنسة لماسورة جابت أثرها لأنه الليلة ما كتب ( جعل الله المانع شر )
على العموم أنا دخلت عليوة واسطة وكمان أخونا حاتم ما شاء الله ظهر بتهديد قوى امل أن تعمل كل هذه الحاجات أثرا فعالا عند ( الما يتسماش ) .... والتحايا موصولة لأخينا محمد حبيب ( ماجداب ) , أينما كان وأواصل حكاوى زمن سودانلاين الجميل من حيث إنقطع عن المرحوم ( مامون إمبيريك ) حينما كان ضابط تانى ومسئول عن الحسابات فى الباخرة نيالا فى رحلة روسيا الشهيرة .....
كنت مهندس تانى فى الباخرة شندى وكانت فى رحلتها الأخيرة لأنتويرب وذلك لتسليمها للمشترى الجديد , وصلنا أنتويرب وأخدنا مرتب الرحلة كاملا وسلمنا الباخرة لأصحابها وكان أملى أن يرجعونا بالطائرة للسودان لأن مواعيد زواجى كانت قد أوشكت حينها .... بكل أسف جاءت الأوامر من الشركة أن أتحول للباخرة نيالا والتى ستصل لميناء
( أفون ماوث ) فى إنجلترا ... أصابنى إحباط شديد ولكنى إستسلمت لقدرى وسافرت لنيالا ...كانت نيالا بها شلة ماشاء الله , أنسى , مامون إمبريك , مصطفى مختار , بنغلاديش , الفاتح الماركونى وبها كذلك شلة عكرة ( عشرة كاديت جديد , قرين , قريش , ودالسر , بابكر عبد الغنى و عبدالعظيم (كجة ) , الرشيد بادى , صلاح الفيل واخرين ) .. كانوا مثالا للثورة على كل شىء ...حينما تقرر أن تسافر الباخرة لروسيا فى أول رحلة جارتر للشركة , إجتمعنا وبأغلبية ميكانيكية تقرر أن لا تسافر الباخرة لروسيا لأن الكونتراكت بتاعنا مافيهو جارتر .. تصوروا ....
إحتج بنغلاديش بشدة لأنه أول مرة يمسك مهندس أول وقال قولته المشهورة :- ( أول حاجة الكاديتية العشرة ديل أسماءهم لسة مامكتوبة كويس فى الشركة... تصويت شنو البيشاركوا فيهو .. أنا غايتو لو براى حأسافر بالباخرة دى والما عاجبو ينزل ) ... إنبسط الكابتن والكابو اليوغسلاف وقرروا يسفروا الباخرة بأى عدد وبذلك طرشقت الثورة المظفرة تلك .
قبل السفر قال لى المرحوم مامون إمبريك إنه الكابتن قال ليهو :- ( المهندس التانى دا أخد ماهيتو فى شندى قبل أيام وتانى ماعنده ماهية معانا ).. طبعا أنا أصلى متحيل , قلت ليهو قول للكابتن ( أنا جيتكم فى أول ميناء لباخرتكم وإذا ما حتدونى مرتبى , لازم تنزلنى وتسفرنى السودان فورا بالطائرة ) ... جاءنى بعد قليل مامون وأخبرنى إن الكابتن قال ليهو :- واضح الزول دا بتاع مشاكل , خلاص أديهو ... سألنى مامون ( نديك كم ؟ قلت ليهو قدر ما أخدت إنت ) وفد كان .. سافرنا لروسيا وبعد فترة عدنا ( صلاح الفيل وأنا ) بباخرة هولندية ومن أمستردام بالطائرة للسودان وتلك قصة أخرى سنحكيها - إن مد الله فى الأجال - ..
المهم حضرت للسودان وحصلت زواجى بعد أن كاد يفوتنى ... وحين عودتى لبورتسودان بعد فترة طويلة وصلت الباخرة نيالا لأول مرة بعد رحلة روسيا ... صعد تيم ضخم من خبراء سودانلاين فى الحسابات للباخرة ( أمين مكى , أمين سيدأحمد , النويرى , حسن الدومة , النزير , كركب ) وبدأوا فى مراجعة الحسابات التى عملها مامون إمبريك فى تلك الرحلة ... قضوا حوالى شهر كامل يراجعوا ولكنهم -بكل عبقريتهم - لم يعرفوا للحسابات تلك رأس من قعر ...أعيتهم الحيلة تماما ..يسألوا مامون ( دى جبتها كيف ؟ يقول ليهم : - والله جبتها لكن مامتذكر كيف ! ) , أخيرا إحتسبت الإدارة أمرها فى حسابات نلك الرحلة وقررت أن ( عفا الله عما سلف فى تلك الرحلة ورموا حساباتها فى مكان قصى ) ولكن المدير قرر أن لا يقوم مامون بمسئولية الحسابات مرة أخرى ...وربما كان هذا هو السبب فى إلحاق الصرافين (البيرسور) فى البواخر للمرة الأولى وقد كان أشهرهم ( النزير ) فى رحلته الشهيرة مع كابتن قاسم وعبدوس وأنسى وتلك قصة أتركها لعبدوس ... لكم الود وليدم مابيننا ...

الرشيد شمس الدين







...

الرجوع الى أعلى الصفحة اذهب الى الأسفل

رد: حكا يا ت من زمن سودانلاين الجميل

مُساهمة من طرف عبد الرحمن الزين في الجمعة 14 نوفمبر 2008, 02:42

يا رشدي السكره تسلم
والله انا ذهني متششت مستعد احكي عن ذكريات البيرسر والنذير والحجاج والحاجة الحمرا والمارسيدس لكن ان يوعدني توحه ما يجيب سيرة بانقا

الرجوع الى أعلى الصفحة اذهب الى الأسفل

رد: حكا يا ت من زمن سودانلاين الجميل

مُساهمة من طرف ود كرار في الجمعة 14 نوفمبر 2008, 03:53

الاخ العزيز الرشيد...

والله حكايات امتاع... بس ذى ماقال العم عبدوس مايجيكم ماسورة داخل شمال...بس ذى ماقال اخونا حاتم وماعندكم مشكله ...طبعا اخونا الفاتح لمن زاملنا على بواخر الوطنية السعودية كان عجز خلاص ...وطبعاُ عارفيين الاسد لمن يعجز البيحصل ليهو شنو...
يعنى مامنو خوف...

لكم التحايا

الرجوع الى أعلى الصفحة اذهب الى الأسفل

رد: حكا يا ت من زمن سودانلاين الجميل

مُساهمة من طرف الرشيد شمس الدين عبدالله في الأحد 16 نوفمبر 2008, 13:23

وتتوالى مفاحاءات المنتدى الرائع تباعا ...فقد تسجل اليوم حبيبنا عبدالعظيم حسب الرسول .... ونحن موعودون منه بالدرر ... عبدالعظيم - وكما يعلم عارفو فضله - من الذين إختصهم الله بقضاء حوائج الناس ..حببهم فى الخير وحبب الخير إليهم ... ( أعتذر إن قصمت ظهره بهذا الحديث) - مرحبا بك يا ( كجة ياعجيب ) ...بيتك ومطرحك ....

الرشيد شمس الدين

الرجوع الى أعلى الصفحة اذهب الى الأسفل

رد: حكا يا ت من زمن سودانلاين الجميل

مُساهمة من طرف خالد عبدالحميد في الإثنين 17 نوفمبر 2008, 02:33

أبهجنا ظهورك يا عبد العظيم،، الف مرحب باحد نجوم هذا الكيان ،، وواحد من أحرف من لعبوا كورة فى الميدان القديم ال فى ميامى ....
وزى كلام الرشيد بيــــتك ومطرحك،،،،، ونتوقع منّك الكتير فى هذا الملتقى

الرجوع الى أعلى الصفحة اذهب الى الأسفل

رد: حكا يا ت من زمن سودانلاين الجميل

مُساهمة من طرف Saadeldien Karrar Ibrahim في الإثنين 17 نوفمبر 2008, 17:04

ألف مرحب بالأخ عبد العظيم حسب الرسول
ونوّر بيك هذا المنتدى الرائع
مع عاطر التحايا
سعدالدين كرار

الرجوع الى أعلى الصفحة اذهب الى الأسفل

رد: حكا يا ت من زمن سودانلاين الجميل

مُساهمة من طرف الرشيد شمس الدين عبدالله في الإثنين 17 نوفمبر 2008, 17:14

غيب الموت الفاجع الأخ حسن عبدالرازق الزين .... الشقيق الأصغر لكابتن عبدالرحمن الزين ...رحم الله الفقيد رحمة واسعة وأسكنه فسيح الجنان .. أصدق التعازى القلبية للعزيز عبدوس ...أحسن الله العزاء وجعلها اخر الأحزان .. وإنا لله وإنا إليه راجعون ...

الرشيد شمس الدين

الرجوع الى أعلى الصفحة اذهب الى الأسفل

رد: حكا يا ت من زمن سودانلاين الجميل

مُساهمة من طرف خالد عبدالحميد في الثلاثاء 18 نوفمبر 2008, 07:53

إنّا لله وإنّا اليه راجعون،، لا حول ولاقوة إلا بالله... اللهم ارحمه والهم آله صبرا جميلا،
تعازينا لعمنا واخونا عبدالرحمن الزين

الرجوع الى أعلى الصفحة اذهب الى الأسفل

رد: حكا يا ت من زمن سودانلاين الجميل

مُساهمة من طرف محمد عثمان (آوى) في الثلاثاء 18 نوفمبر 2008, 12:24

إنّا لله وإنّا اليه راجعون،، لا حول ولاقوة إلا بالله... اللهم ارحمه والهم آله صبرا جميلا،
تعازينا لاخونا عبدالرحمن الزين والعائلة الكريمة وألف رحمة ونور تتنزل على الفقيد

الرجوع الى أعلى الصفحة اذهب الى الأسفل

رد: حكا يا ت من زمن سودانلاين الجميل

مُساهمة من طرف الرشيد شمس الدين عبدالله في الأربعاء 19 نوفمبر 2008, 12:53

وماتزال الأخبار الجميلة أيضا تترى على المنتدى فقد تسجل فيه اليوم صديقنا العزيز , أحمد المرتضى , له التحايا الصادقة وفى إنتظار التواصل المفيد ...فقط أرجو أن تكون مساهماته القادمة بالعربى وما فى مشكلة إذا كان ما متعود على الكتابة بالعربى لأنه كان فى واحد ما يتسماش قال ما بيعرف يكتب بالعربى وفى يومين بس ملأ المنتدى لحدى ما بقينا نفتش فى البيحلنا .. لك الود أحمد المرتضى ... بيتك ومطرحك ...وفى إنتظار أخبارك ...

الرشيد شمس الدين

الرجوع الى أعلى الصفحة اذهب الى الأسفل

رد: حكا يا ت من زمن سودانلاين الجميل

مُساهمة من طرف احمد محمد احمد في الأربعاء 19 نوفمبر 2008, 20:50

إنّا لله وإنّا اليه راجعون،، لا حول ولاقوة إلا بالله... اللهم ارحمه والهم آله صبرا جميلا،
تعازينا لكابتن عبدالرحمن الزين والعائلة

الرجوع الى أعلى الصفحة اذهب الى الأسفل

رد: حكا يا ت من زمن سودانلاين الجميل

مُساهمة من طرف الرشيد شمس الدين عبدالله في الخميس 20 نوفمبر 2008, 17:15

هلت البشائر اليوم بتسجيل صديقنا الحبيب كابتن حمد النيل حماد ...وكابتن حمد غنى عن التعريف فهو من جيل البطولات فى سودانلاين وله أيادى طويلة بيضاء على الكثيرين منا ... نكرر الترحيب الحار به وفى إنتظار الدرر منه .. كما نطلب منه الدعاء لنا وهو فى البقاع الطاهرة ( وطبعا حمد قالوا بقى ( يروب الموية ) ..تلحقنا وتنجدنا ...
لكن باكر عبدوس يظهر وتظهر معه القصص القديمة ...

الرشيد شمس الدين

الرجوع الى أعلى الصفحة اذهب الى الأسفل

رد: حكا يا ت من زمن سودانلاين الجميل

مُساهمة من طرف Saadeldien Karrar Ibrahim في الخميس 20 نوفمبر 2008, 17:46

ألفين مرحبا بالعزيز جداَ
كابتن حمدالنيل
وعاوزين إسهاماتك تتواصل زى النيل
سعدالدين كرار

الرجوع الى أعلى الصفحة اذهب الى الأسفل

رد: حكا يا ت من زمن سودانلاين الجميل

مُساهمة من طرف الرشيد شمس الدين عبدالله في الخميس 20 نوفمبر 2008, 20:42

بمناسبة توقعنا إنه عبدوس ينكت القديم لمولانا حمد النيل المقيم الأن فى السعودية , أضحكتنى هذه النكتة التى سمعتها بالأمس , أسمحوا لى أن أشرككم فيها كتخريمة .....
طبعا الناس فى السعودية ودول الخليج ينطقون أفعال المضارع بثبوت النون ( ما زينا نحن وهم الأصح لغويا ) , فهم يقولوا : ( تأكلون , تشربون .. ونحن نقول : تأكلوا وتشربوا ... ) ..
يحكى أن سودانيا كان يعمل مع كفيل سعودى وكان السعودى مبسوط منه ولكنه زعل حين علم إنه يشرب الخمر , فأصر أن يتحدث معه فى الأمر وناداه وأجلسه قربه وقال له :-
( تعرف يافلان , إنتم السودانيون ناس ممتازون ونحن نحبكم جدا لأنكم أمينون , تصلون وتصومون وتواصلون الأرحام ولكن فقط عندكم عيب واحد بس كبير ....)
قال له السودانى :- ( خير ياعمى ..... ) .
قال له السعودى :- ( عيبكم الوحيد إنكم .. تشربون ... ) ..
رد عليه السودانى قائلا :- ( لكن ياعمى , لو ما تشربون , تموتون ....) ..
وطبعا يا عبدوس أخونا حمدالنيل ( يشربون ماء زمزم فقط ... ) ..لكم الود وليدم مابيننا ...



الرشيد شمس الدين

الرجوع الى أعلى الصفحة اذهب الى الأسفل

رد: حكا يا ت من زمن سودانلاين الجميل

مُساهمة من طرف الرشيد شمس الدين عبدالله في الإثنين 01 ديسمبر 2008, 22:53

من المفترض أن يكون الأخ –الإبن خالد قد غادر اليوم إلى الأراضى المقدسة لأداء فريضة الحج ..حجا مبرورا وعودا حميدا ونرجو ألا ينسانا من صالح الدعوات فى تلك الديار الطاهرة .... وقد أرسل لى خالد رسالة رقيقة قبل أيام وقد كبر بتلك الرسالة فى نظرى أضعافا مضاعفة إذ أننى لمست فى رسالته كم هو مسكون بحبكم ومهموم بإستمرار التواصل فى المنتدى أثناء غيابه ...وقد أوصانى كثيرا ... ورغم صعوبة المهمة بأن أقوم بالإتصال بكم لعدم الأنقطاع عن المنتدى فلم أجد أمام نبل مقصده إلا الموافقة وهاأنذا أحاول جاهدا وأرجو مخلصا ألا تخذلونى ..
عبدوس العزيز ...أين أنت مسجل غياب حتى لقد أصابنا القلق عليك ...أملى أن تكون بخير وأن تعود فبدونك يبدو المنتدى موحشا والله ... لا أظن أن مشكلة الكمبيوتر هى السبب ثم إن ماسورة وعد فى خصوص بانقا والغريبة إنه ما زال عند وعده ..فلماذا (ياواد ياتقيل ...؟ ) ..
العزيز اوى , لماذا الإنقطاع المفاجئ بعد حماس الجمعية الأستثمارية فى البداية ؟ هل ماتزال عاداتنا فى البحر هى الحكم ...نبدأ بحماس ثم ننتهى إلى مافيش ؟ لقد جعلتنا نحلم كثيرا فلماذا تريد أن يموت الحلم نديا ... ثم إذا كانت هناك مصاعب تواجه المشروع , هل كنت تتوقع غير هذا ؟ ثم لماذا لم تشرك المنتدى فى المصاعب لأنه على قدر أهل العزم تأتى العزائم ونصف رأيك عند أخيك ....
العزيز ماسورة ..أكاد أجزم أن سبب الإنقطاع هو الهدنة التى فرضت عليك لأنك لا تجيد سوى الشتائم ...إذا كان ذلك كذلك فنرجو من عبدوس الإذن فى موضوع سونيا والمجنون البرتقالى ولكن بانقا خط أحمر ....
حبيبنا ود كرار .وأنت من مبتكرى المنتدى فلماذا فترت الهمة بعد ان إحتفلنا بالمشاركة المئوية لك .
عاطف القوز ...أين أنت وبورداب الإمارة الفتية ..ألنتو وبشارة هبانى ؟ لماذا الإنقطاع ؟
سعد كرار فى إجازة من اليوم وبالتأكيد سيواصل من السودان إن لم تشغله مشاغل الحياة هناك وهى كثيرة ....
سيف مصطفى ونقدالله وقريش ليكم وحشة شديدة ..أظهروا من فضلكم ...
بابكر يوسف الحبيب ...هل هنالك مشكلة فى التواصل من مصر ؟ يكفى أن حمدالنيل ظهر عن طريقك ولكنك أختفيت رغم أنك من أولى السبق فى المنتدى وفى كل عمل للخير .......

الأحباب الأعزاء ...هذا من عشمى فيكم ومن حبى لكم ومن شدة الوحشة فى غيابكم فهل أنتم مستجيبون ؟ كل عام وأنتم بألف خير والسنة الجاية أجمل السنوات صحة وعافية وسترة حال ..وليدم أبدا مابيننا .........

الرشيد شمس الدين

الرجوع الى أعلى الصفحة اذهب الى الأسفل

رد: حكا يا ت من زمن سودانلاين الجميل

مُساهمة من طرف ود كرار في السبت 06 ديسمبر 2008, 17:09

الاخ الفاضل الرشيد...

كل عام انت والاسرة بألف خير...

أخونا خالد وصل بسلامة للاراضى المقدسة بعد رحلة طويلة عبر بلاد المغرب..نسال الله ان يجعل مشقة السفر فى ميزان حسناته...وننتظر تفاصيل رحلة الحج منه بعد العوده للبلاد الفرنجة.

لك الود

الرجوع الى أعلى الصفحة اذهب الى الأسفل

رد: حكا يا ت من زمن سودانلاين الجميل

مُساهمة من طرف shabo في السبت 13 ديسمبر 2008, 06:23

الاخ باش مهندس الرشيد شمس الدين
تحياتي واشواقي الحارة كل سنة و انت طيب و اعاده اللله علينا بايمن والبركات اما بعد
انت الان في موقع مسؤولية كبيرة يتطلب منك دائما الدقة والحذر والتحقق من الاقاوييل والاشاعات لان كل ما ذكرته مجافي للحقيقة تماما وانت تعلم انني كنت من الطلاب البحريين المميزين في الكلية البحرية في يوغسلافيا ولا يعقل ان اتصرف بهذه الطريقة, وانا احترم فارق السن بيننا و كذلك ال position سابقا , وكان شفتا يا شمس الدين هاهاهاها هاها
تحياتي للكابتن عبد الرحمن الزين لك الود والتحايا والاشواق اولاد البلد لن تتلاحق الكتوف بينهم ولن تنطوي المسافات والمكانات ولن نستطيع ان نختصر الزمن فانت كبيرنا وحبيبنا وكل الذي رأيته من الدنيا والى الدنيا و لكنكم باقون في الوجدان ما بقي الدهر فأنتم اساتذتي ولكم الود والاحترام والتحية والحب الكبير و في الختام دائما اطراكم بالخير واسعى للقياكم واتمنى ان نلتقي فب عرس بنات هاشم بخلن ومحمد حسين بالخرطوم في العشرينات من هذا الشهر والسنة الجاية ان شاء الله حيكنوا اجداد ويكون باقي ليهم الحج و الاردن ان شاء الله يحسنوا اعمالهم من هنا ولي قدام

الرجوع الى أعلى الصفحة اذهب الى الأسفل

رد: حكا يا ت من زمن سودانلاين الجميل

مُساهمة من طرف الرشيد شمس الدين عبدالله في الإثنين 29 ديسمبر 2008, 15:41

الأحباب الأعزاء
كل عام وأنتم بخير , عدت من إجازة لأكثر من أسبوعين وأنا فى وحشة شديدة لكم وللمنتدى الجامع ... أملى أن يكون العزيز خالد قد عاد سالما معافى ( داخليا وظاهريا ) من الحج ...حجا مقبولا وعودا حميدا وأن يكون قد تذكرنا بصالح الدعوات فى تلك البقاع الطاهرة .... ولقد حاولت والله يا خالد أن ألبى وعدا قطعته لك قبل سفرك للحج وسفرى فى الإجازة ولقد حاولت وسعى والله ولكن يبدو أن دعواتى للأصدقاء ( ما جابت أى دخل ) إلا من بعض محاولات خجولة من عاطف القوز ومحجوب الريس وحمدالنيل ولكن سعدنا بإنضمام عزيزنا عوض شبو ( وكان شفتو ياشبو ؟...لا لا ) ... العتبى الصادقة خاصة لعبدوس ولماسورة ...ولك العتبى يا خالد حتى ترضى لكم الود وليدم مابيننا ...

الرشيد شمس الدين

الرجوع الى أعلى الصفحة اذهب الى الأسفل

صفحة 5 من اصل 27 الصفحة السابقة  1, 2, 3, 4, 5, 6 ... 16 ... 27  الصفحة التالية

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى