للخرطوم سلام ......

استعرض الموضوع السابق استعرض الموضوع التالي اذهب الى الأسفل

للخرطوم سلام ......

مُساهمة من طرف عارف عباس المصري في الخميس 14 فبراير 2013, 22:23

أحنّ إلى خبز أمي
و قهوة أمي
و لمسة أمي
و تكبر في الطفولة
يوما على صدر يوم
و أعشق عمري لأني
إذا متّ،
أخجل من دمع أمي!
خذيني ،إذا عدت يوما
وشاحا لهدبك
و غطّي عظامي بعشب
تعمّد من طهر كعبك
و شدّي وثاقي..
بخصلة شعر
بخيط يلوّح في ذيل ثوبك..
وانا اجمع اشيائي الصغيره لم اترك عادتي في اختلاس كتاب من مكتبه الوالد مد الله في عمره ومتعه بالصحه ...عليه دوما وبخطه الانيق توقيعه وختم باسمه ومهنته في الصفحه الاولى وكالمعتاد بخط اليد مكتوب التاريخ ومكان الشراء القاهره مثلا او سواها واسم الهادي للكتاب رائد او حسن ونادرا جدا .......انا
وقد كلفتني عادتي رهقا يهون على النفس ويجعل طفولتي وحركاتي الأرعه مكشوفه على الأخر ...حيث كيف لي ان امتلك اي وسيله مقنعه للمحاججه او التملص من المسئوليه التنظيميه للعمليه في النمليه والتى اطلقت عليها طاقيه سلفاكير امام صك الملكيه المختوم الدامغ فأحيانا يجيئني اتصال من الوالد وبسؤال وامر مباشر الكتاب الفلتكاني فتشت عليهو وزي ما شلتو ترجعو فاهرع لمكتب بريد كفر ابوحدايه الهولندي الصارم موظفه فينظر لي بشك فشكلي شراني وفزييييييع يمكن؟ انظر في عينيه بابتسامه زولا فقري جدا فلا انا ابو قتاده ولا الكتاب زاتو حقي فيقول لي سودان !!
فاردد كارتوم ...
خبئت الكتاب بحرص وخرجت لاستقبال صديق فنان تشكيلي رائع جلست معه نشرب القهوه ونتحادث حتى نادتني امي قائله عصمت قال التركيه زحمه تمشي بدري الساعه حداشر ونص....
بس ياحجه انا بكره قعدة المطار براااي وقهوتم زفت ومافي غير غرفه التدخين الزغيرونه والضيقه وقلع قروشك من العامل بتاع الميزان وكل شويه تجي موظفه وتؤشر لكل مدخن واعيننا حمراء داميه داامعه من خلطه المارلبورو مع سوري واصحابو وهم يحكون عن مآسي وطن جريح يتقاتل اهله وارتريين يشفطون برينجي ويبرطمون يتناقشون وينظرون في جوازات بعضهم البعض بهمس مسموع ...
ومغترب بي بينسون كبير
وانا بي قمشه هولنديه تأشر الموظفه لكل منا وتسأل العربيه الشارقه؟
فيقول كل منا لأ.....ووجهته والشركه الناقله !!!!!
بطل الكلام الكتير ياعارف في دوما احتياطي ركاب والبلد دي انحنا ناس طيبين فممكن يساعدو زول يركبوه مكانك لو اتأخرت اسمع الكلام
اصلو انا راكب بص الوالي يفحطو ويخلوني كدي ياحجه اودع صاحبي وارجع احكي ليكي اخر نكته بشرط تسمحي لي اشيل كبايه قهوه اقرطعها في العربيه وانا ماشي المطار كسرا لحظر قديم فقد كنت كل يوم اشرب في العربيه الصباح ودونا عن اخوتي شايا او قهوه لما تطورت تعليميا واعقبها بسفه سعوط سريه زغيرونه باللشلوفه الفوق لما بلغت الثانويه
وانخرطت في تهاويمي القوميه والاشتراكيه وكده !!!
فكانت الكبايات مختلفه الاحجام تتطاقش تحت اقدامنا كأنها رنين خلخال بت رشايده تقطع شارع الزلط جنب السفاره السعوديه اليوم في الصباح نفسه كنت هناك كنت معزيا بمأتم حسين البصير عليه الرحمه والمغفره انشاء الله .
ففقدت امتياز الجري صباحا بالكبايه مهرولا اخررررر زول واحيانا كان بيمشو وانا اعييييييييييط وامش واجيهو راجع .... وانا ..انا في التمني.... واختار امشي وكت ما داير وهنا نبت عندي موضوع حق اختيار البتاع ..... ماعلينا ,
حق الله بق الله
ادوني مع العناق قهوه كاااااربه عملتها الحاجه بيدها الطاهره الله يخليها اديت القهوه لايوب السائق المتعلم المهذب ود البلد ودعت الحاج مره اخرى سألني شلت كتاب ؟
أي يابوي السأم لالبرتو مورافيا
تعال يا ابني اي وقت مرحب بيك
الله يخليك ويحفظك يابوي ...مع السلامه يا ابني لا اله الا الله ...مرددا انا محمد رسول الله
سألتني امي وانا مع الذاهبين معي للمطار نأخذ مقاعدنا بالسياره عشان نمشي المطار اخدت التذاكر والجواز والشنط ومفاتيح بيتك هناك... معاك قلم ؟
معاي كل حاجه بس هي هسي وين ده ..وديك شنو ما بعرف بس مؤكد شلتهم معقول يعني انسى....!
انت مش المره الفاتت نسيت ...
انا مقاطعا وزائغا من اشكاليات سفري واخطائي لما يمكن بلغت مرتبه الاعجاز في الانجاز المره الفاتت لما ركبت طياره تانيه يوم 11-9 وتخلفت حقائبي باسطنبول ودي براها حكايه... ربما ان مد الله في الآجال اسردها لكم فقد كان لها تداعيات كارثيه انعكست حتى على تفتيشي الدقيق لما حضرت الحقائب متهاديه كناقة تقطع فيافي درب اربعين عثروا يومها على القونقليز المسحون بتاع ابو مينا شارع الديم طلب ام حسام الله يخليها واللي كان ممكن ان يكتب اي حاجه بالانقليزي ده يامرسي ...
ويوفر على الشرطه في مطار شيخيبول امستردام وانا سف ولحس كميات في الصاله وتناثر ذرور التبلدي من افواهنا وهم يتصايحون واووووووو
وانا مسرورا نافثا قدرا من المسحوق كتراكتور هرم
ييس ...ييس ...نايس
قوونقولييييز نوت بلييييز نو
زيس ..قونقووليز ياتيس سي اي تيك يو تيك
ماعلينا ......وهكذا السفر وهل لابد من صنعاء!!!!
النكته قصه حقيقيه ناس الأمن قبضو على سايق ركشه (تك تك) لانو كاتب تسويهو في الخلق تلاقيهو في الحلق ....وعجبي
للجميع شوقي وتحياتي واحترامي وللخرطوم سلام ...

الرجوع الى أعلى الصفحة اذهب الى الأسفل

للخرطوم سلام ......

مُساهمة من طرف عارف عباس المصري في الخميس 14 فبراير 2013, 22:31

قرار سفري للخرطوم لم يكن مفاجئا فقد كان مقررا نوعا ما رغم كوني عدت من هناك يوم 11~9 الماضي يعني فقط اربعة اشهر قد إنقضت وقد كان لتأريخ اقامتي بالسودان دافع رئيس ضمن دوافع اخرى لقرار السفر فالبطاقه الخاصه بالاقامه مدتها خمس سنوات والتي كنت قد إستخرجتها من بوليس الاجانب بجاردن سيتي ايامها ستنقضي صلاحيتها يوم 12~1~2013 ويلزم تجديدها ووجدتهم حينما استخرجتها لحسام ووالدته قد انتقلوا الى جوار السوق الشعبي بالخرطوم{تناولت الموضوع هنا في للخرطوم سلام
والعصافير تهجر الأوكارا
وديار كانت قديما ديارا
سترانا كما نراها قفارا
سوف تلهو بنا الحياة وتسخر.......
وحيث اننى لم استطع هذه المره ان استقل طائرتي من اسطنبول~ للخرطوم كما هو محدد بسبب العواصف الثلجيه والغاء الرحله للخرطوم اضطررت وبعد مشادات وصياح بيننا نحن مجموعه ركاب سودانيين اتلمينا في مطار السجم واللخبته وسوء التعامل والذي لاحظنا جمعنا انها ليست موجهه للون او عرق او فئه انما هي سلوك وعرق تراكوه وقلة ادب و .... وبس .
نحن المتجمعين من اصقاع شتات جليد ارصفة البسيطه والناظرين بريبه وتوجس من اي حركات عنصره متعوووووده داااايماااا .... ربما نحن انفسنا فيما سبق وربما حتى اللحظه يوميا نمارسها قولا وبدون ان نشعر كقولنا :
والله العبي ...وقد نتدارك ونواصل الحديث المجنبه عكلتو ليك مع الجماعه في اديس !!!!
حتى انشطر الوطن وقد حضرت انا ورفيقة دربي يوما برنامجا على القناة السودانيه اقنعنا فيه المذيع انو خرطه السودان الجديده شكلها اجمل و ..حقيقه يعنى
وقد انفعلت وصحت بابني المشغول بالطابق الاعلى ان يأتيني بمقص المطبخ الحاد وليس مقص الشارب{لازم تكون وااااضح إلا يجيبو ليك العكس} وخارطه السودان الجلديه الملونه والتي اشتراها حسام من سوق امدرمان لأقص حنانها ...
فوجئت بحسام يصيح وانا قد عضضت لساني وبرقت اعيني بلمعه الشيطنه وكأني كوز في مجلس اربعينهم ....انشاء الله الله يريحنا من كبشه منهم قريبا ...
فوجئت بحسام يصيح خليهوووو ...خليهوووو
فنظرت في عينيه ورددت ضاحكا
خليهاااا ...خليهاااا مش خليهوو
عربي جوبا بتاعك ده جد شين هسي بتعرف تورشين ؟؟ ده صاحب المتحف بيت الخليفه عبدالله المشيتو في امدرمان لقبو يا بني .
وخليتووووو عل وعسى ...
في المطار باسطنبول تزعمتنا سيده سودانيه محاميه راقيه قادمه من اميركا وتحمل جواز هولندي وعريس شاب سوداني من اولاد الجريف غرب يقطن بمدينة أوترخت الهولنديه واقتلعوا لنا غرف بفندق على ان يدفع كل منا 15 يورو للفيزا ....
اكتفيت بترديد ادب يوك
وأمان ياربي أمان ... عسكوره حايمه تشبه نور ولا هيام الشديده في حريم السلطان مافي عالم بالجد نصااااابه وباعولنا الظاهر ساعة المحطه ... واشتريت علبة لكوم وزعتها على الفصيل في احتفاليه نصر تأخر من شيكان ..اقصد المجموعه المنافحه وتمنيت لو كان عندي عكاز لما توانيت البته (شفتو البته دي !!!! انا زاتي اتكيفت منها) عن تقديم فاصل رئاسي يجعل الترك وفي مطار اتاتورك يقبعون في جحر ضب ...هنا استعير من اقوال الجهبذ المنظر نافع واصفا به المعارضه بأنها في جحر ضب منتهى البلاغه لاتخرج الا من فاه صرصار في بلاعه .
لذا يوم وصولي للخرطوم فجرا وبعد سلامات سريعه وقهوه وحكوه وبمعية ايوب متأبطا اوراقي منتعلا مركوبي وبجلابيه انصاريه وطاقيه يمكن تشاديه!! وبسرعه وبدون واسطه (بالجد ماعندي واسطه محدده ومابفتكر الموضوع اصلا بحتاج وحأدفع قروش للحكومه وقد عملتها هذه الاقامه اللعينه وحدي .. وسأجددها وحدي) ...
وهكذا تحركنا للمبنى القريب من السوق الشعبي لنجد الالاف الموئلفه من الارترييين والارتريات والاثيوبيين والاثيوبيات زحام خرافي خارج المبنى لا مكان لايقاف السياره ركشات ... امجاد...عربات ...جلوس ووقوف ناس ماشه وناس جايه وبوليس وشفع ... مولد وصاحبو غايب زحمه للطيش جوووووطه ماتديك الدرب .
ايوب قال لي ياخال تخش توووووش ماتقيف وراهم انت سوداني نظرت اليه بتقدير وامتنان ودخلت في الشبكه انا اخوك العازه .....
واعجبني ان يمر بخاطري الرسول فجوله تلعب وتخيلت جموعهن يرقصن كفيلم هندي لراج كومار ينادي مهبتي كااااا فيخرج الاف الكومبارس من الطرقات وخلف الاشجار من الجنسين يلبسون زاهيات اللون ويتقافزون برشاقه صائحين نهي نهي مهابتي نهي نهي ....
وننسي في الزحمه ان نسأل هم ديل منو ؟ وجابهوم من وين !! ديل شلة راج ولا الحبه بتاعتو !!!واللي حشرهم في الفيلم اصلا شنو ....!
استدركت الموقف وصحت بحماسه وانا اولع سيجاره اسمع يا أيوب ..
اقرص لي سنه ناعمه هنا انت وفتش ليك باركينج وانا حانزل اطقش مع الناس ديل ورقم تليفوني معاك بيناتنا الو ....
ونزلت ...........
اطلت عليكم هذا الصباح ؟ فعذرا ...........وحتى نعود انشاء الله لكم تقديري واحترامي وللخرطوم سلام ,

الرجوع الى أعلى الصفحة اذهب الى الأسفل

رد: للخرطوم سلام ......

مُساهمة من طرف عبد الرحمن الزين2 في الجمعة 15 فبراير 2013, 01:37

العزيز جدا الاستاذ عارف عباس المصري...
متابعين وباستمتاع..رغم انو نفس الفلم دخلناه في كلوزيوم وفي الوطنية بحري.. لكن سردك للاحداث والوقائع..رائع ..رائع.....مبالغة... ارجوك واصل
عمك عبد الرحمن الزين

الرجوع الى أعلى الصفحة اذهب الى الأسفل

رد: للخرطوم سلام ......

مُساهمة من طرف خالد عبدالحميد في الجمعة 15 فبراير 2013, 06:22

يا عارفا
ياخى ازيك، كل الامكانيات دى فى الكتابة وتغيب دهرا؟ حكاوى شيقة ووصف فنان
والله شهيتنا خرتوم الفيل، التى فى البعاد عنها عذابات وحين عودة لها، افلام
مدهشة هذه الخرتوم/مدهشة،،،، دهشة تصل حد الإلهام الذى ينتج هكذا ابداع
يسلم القلم، وتسلم كُتب الدكتور الوالد(الملطوشة) التى كانت الغرس الاول فى سطورك وابقى قريب، وتم لينا حكاية مطار اسطنبول ونحن هاهنا قاعدون

الرجوع الى أعلى الصفحة اذهب الى الأسفل

رد: للخرطوم سلام ......

مُساهمة من طرف عاطف عكود في الجمعة 15 فبراير 2013, 14:43

عارف عباس المصري كتب:

اطلت عليكم هذا الصباح ؟ فعذرا .........

وللخرطوم سلام ,
نحنا لاقينك وييييين حبيبنا عارف يا مصرى عليك الله أطل قدر ما الله يديك ، بس بلاش تطول الغيبه والانقطاع ، والشوق بحر وسلام لشخصك والخرطوم.
عاطف عكود

الرجوع الى أعلى الصفحة اذهب الى الأسفل

رد: للخرطوم سلام ......

مُساهمة من طرف عبد الرحمن الزين2 في الأحد 17 فبراير 2013, 02:29

من اقوال الجهبذ المنظر نافع واصفا به المعارضه بأنها في جحر ضب منتهى البلاغه لاتخرج الا من فاه صرصار في بلاعه ....

الاستاذ..عارف...طول حياتك لو لم تكتب غير هذه العباره لكفتك...لول...ابدعدت وفيت وكفيت..
عبد الرحمن

الرجوع الى أعلى الصفحة اذهب الى الأسفل

رد: للخرطوم سلام ......

مُساهمة من طرف عارف عباس المصري في الأحد 17 فبراير 2013, 03:07

أيها الواقِفونَ على حافةِ المذبحهْ
أَشهِروا الأَسلِحهْ!
سَقطَ الموتُ; وانفرطَ القلبُ كالمسبحَهْ.
والدمُ انسابَ فوقَ الوِشاحْ!
المنَازلُ أضرحَةٌ,
والزنازن أضرحَةٌ,
والمدَى.. أضرِحهْ
فارفَعوا الأسلِحهْ
واتبَعُوني!
أنا نَدَمُ الغَدِ والبارحهْ

.....
أمل دنقل
الاساتذه الاجلاء عبد الرحمن الزين وخالد عبدالحميد وعاطف عكود لكم كل مودة وتقدير سأعود انشاء المولى لتناول وقائع ايام قضيتها بين الاهل والاصدقاء بالخرطوم ولهم ولكم شكري الجزيل لفيض المشاعر والألفة مع مودتي وتحياتي .

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى