الشايقى المشلخ و الامريكى الذى لا يقهر

استعرض الموضوع السابق استعرض الموضوع التالي اذهب الى الأسفل

الشايقى المشلخ و الامريكى الذى لا يقهر

مُساهمة من طرف احمد محمد احمد في السبت 16 نوفمبر 2013, 15:33

قبل حوالى اسبوعين كنت اقلب فى القنوات التلفزيونية و انا فى انتظار حلول موعد الكلاسيكو بين برشلونة و ريال مدريد. توقفت عند قناة ام بى سى اكشن و التى كانت تعرض المسلسل الامريكى "NCIS: Los Angeles"  و هو من المسلسلات عالية المشاهدة و يأتى ترتيبه الرابع  في ترتيب البرامج والمسلسلات العشرين الأعلى مشاهدة في الولايات المتحدة الأمريكية و الذى تدور حلقاته حول دائرة تحقيقات الجرائم التابعة للبحرية الامريكية و الذين ينجحون فى الوصول للمجرم فى نهاية كل حلقة و تسليمه للعدالة ليأخذ جزائه او قتله اذا دعا الحال و توفير نفقات السجن و المحاكمة.
 
شدتنى الحلقة لأن موضوعها يهمنا.
 
باختصار كان موضوع الحلقة يدور عن مجموعة من الارهابييين دخلوا الولايات المتحدة يحملون كمية من اليورانيوم الذى حولوه الى بودرة و ينوون استعماله لتسميم الالاف الموجودين فى مجمع حكومى كبير.
 
و لكن دائرة تحقيقات الجرائم البحرية - كالعادة - تمكنت من التدخل فى الوقت المناسب وتمكنت من التعرف على الارهابيين على انهم سودانيين و ذلك عن طريق متابعة زعيمهم و التعرف عليه من شلوخه التى اوصلتهم الى انه من قبيلة الشايقية فى السودان.
 
انتهت الحلقة - كالعادة - بقتل كل المجموعة الارهابية السودانية و استرداد اليورانيوم و سلمت الولايات المتحدة بفضل الامريكى الذى لا يقهر.
 
المحيرنى انو الامريكان عاملين لينا شنة و رنة فوق شنوا ؟؟؟ نحن لو بنعرف قدر دة كنا على الاقل شبعنا ناسنا مش كل يوم الناس يموتوا من سوء التغذية و الامراض الناتجة عنها..... هذا اذا لم يموتوا من طلقة عرف مصدرها او لم يعرف.


عدل سابقا من قبل احمد محمد احمد في السبت 16 نوفمبر 2013, 17:22 عدل 1 مرات (السبب : تعديل حرف)

الرجوع الى أعلى الصفحة اذهب الى الأسفل

رد: الشايقى المشلخ و الامريكى الذى لا يقهر

مُساهمة من طرف عبد الرحمن الزين2 في الأحد 17 نوفمبر 2013, 01:43

المحيرني  يا  قبطان انو اي قبيله في السودان  ينتهي نسبها الي احد الصحابه  او ال البيت....  طبعا الا ابو جهل و ابو لهب..الشايقيه  باين عندهم  قول  ..لكن حسب غتاتهم  حمدو في بطنو.. ما ينط لينا واحد شايقي... انحنا لاقين  نطو..بس  خشوا..  وعلي قولك  ده نحنا  السودانين ديل..غلبانين بشكل.....
معزتي..

الرجوع الى أعلى الصفحة اذهب الى الأسفل

رد: الشايقى المشلخ و الامريكى الذى لا يقهر

مُساهمة من طرف احمد محمد احمد في الأحد 17 نوفمبر 2013, 04:45

سلام يا كابيتان
 
قبل فترة جابوا دكتور فى تلفزيون السودان ( من كلامو عرفت انو شايقى) عامل كتاب عن العباسيين فى السودان. الدكتور قال انه يقدر عدد الذين ينحدرون من نسل العباس فى السودان من 17 الى 18 مليون كأكبر تجمع للعباسيين فى منطقة واحدة فى العالم.
 
عارف نوع الدكتور دة البجيب الكفوة و يكون هو اللفت نظر الامريكان للموضوع دة و خلاهم يختوا الشايقية فى بالهم و يجيبوا سيرتهم  كارهابيين و الجماعة ديل زى ما عارف ما بيعملوا حاجة ساكت ولا بالصدفة فالمسلسل دة بيشوفوا فى امريكا بس اربعين مليون كل اسبوع. واضح انوا بيوصلوا لناسهم فى رسالة معينة.
 
على كل حال نحن مع اخوانا الشايقية قلبا و قالبا فهم بالنسبة لنا زى الملح فى الملاح والسودان دة بدونهم لا ببقى لا بتسكن فأى حى ما فيهو شايقى ساكن ببقى مسيخ و ما بيتقعد.
 
مع التحايا لكل السودانيين بمختلف اثنياتهم فهم يشكلون بتنوعهم اجمل و افضل شعب على مر التاريخ بس ضارباهم عين.

الرجوع الى أعلى الصفحة اذهب الى الأسفل

رد: الشايقى المشلخ و الامريكى الذى لا يقهر

مُساهمة من طرف عبد الرحمن الزين2 في الأحد 17 نوفمبر 2013, 19:59

مع التحايا لكل السودانيين بمختلف اثنياتهم فهم يشكلون بتنوعهم اجمل و افضل شعب على مر التاريخ بس ضارباهم عين.

,ماطالبني حليفه يا  قبطان  في دي اتفق معك تماما...لكن لو تستمع لكلام بعض هؤلاء  حتجن عديل مش حتتجنن..زمان كان الوحد  بزعط  شعرو...  هو قال ليك  الصلعة دي وراثه...كضبا كاضب..
واحد مره قال السودانيين اكثر شعوب العالم  قاطبة  صلاة علي النبي وعندو احصائئية..يا رجل اندونوسيا فيها 170 مليون مسلم..علي الأقل والله اعلم..
واحد تاني  مدير إذاعة مديح  قال شاف النبي في الأستدويو مشرفا ومخرجا..
انصحك ما  تتابع  تلفزيون وإذاعة السودان..انت برضو مش  عندك  عيال...
ارقد عافية..
عبد الرحمن

الرجوع الى أعلى الصفحة اذهب الى الأسفل

رد: الشايقى المشلخ و الامريكى الذى لا يقهر

مُساهمة من طرف احمد محمد احمد في الإثنين 18 نوفمبر 2013, 04:16

سلام يا كابيتان
 
يا زول ما تخاف علينا نحنا اخدنا مناعة و بقى ما بيأُثر فينا اى شئ من كترة البلاوى الشايفينها.
 
شوف الفلم الظريف دة عن جزء من الحاصل:
 
فيلم عجيب عن طرد الجن والزار في السودان
 
 http://www.youtube.com/watch?v=Xmt6wJsIwR4

الرجوع الى أعلى الصفحة اذهب الى الأسفل

رد: الشايقى المشلخ و الامريكى الذى لا يقهر

مُساهمة من طرف osman abdel rahman في الإثنين 18 نوفمبر 2013, 15:02

سلام اخى قبطان احمد
سلام لكل السودانيين
طبعا اخوانا اولاد جعل بدون اهلنا الشوايقة الحياة تصبح ليهم مسيخة - و هناك الكثير من الحكايات و النكات توضح ذلك
و ده كله كان من باب جميل - فقط للضحك و المرح
المصيبة اليوم يا قبطان الكلام اصبح كله قبليات وصلت لدرجة الحروب و القتال و طبعا ما شاء الله على حكومتنا هى التى اوصلتنا الى ذلك
خلاص الفاس وقع فوق الراس
سلامى لكل شعبنا
المشلخ و السادة
عثمان بخلن

الرجوع الى أعلى الصفحة اذهب الى الأسفل

رد: الشايقى المشلخ و الامريكى الذى لا يقهر

مُساهمة من طرف احمد محمد احمد في الثلاثاء 19 نوفمبر 2013, 04:34

و الله يا عثمان الواحد يشعر بحرقة شديدة لهذه الردة التى حدثت لبلد تسندها سبعة الاف سنة من الحضارة و من اوائل الحضارات التى اقامت نظام دولة متكامل اقرب للدول الحديثة قبل الاف السنين. حينها كان الاروبيين يسكنون الكهوف.

الرجوع الى أعلى الصفحة اذهب الى الأسفل

استعرض الموضوع السابق استعرض الموضوع التالي الرجوع الى أعلى الصفحة


 
صلاحيات هذا المنتدى:
لاتستطيع الرد على المواضيع في هذا المنتدى