كانت مع هرم من اهرامات الإداره فى سودان لاين بل فى السودان كله.الا وهو الإدارى الفذ صلاح الدين عمر, كان ذلك فى بداياتى مع سودان لاين عندم تم اختيارى للدراسه بالاسكندريه ..ايوه الاسكندريه ولكن بفعل( نيران صديقه) تم ابعادى وتحويلى الى يوغسلافيا بعد 8 اشهر( يا ناس اسكندريه 77 فتشو لى الزول ده منو). بينى وبينكم القصه عجبتنى وقلت يا ولد مصر بتاعت شنو ده اوربا الدنيا والعالمين (وين احمد سيد احمد ربنا يطراه بالخير).لكن الجماعه بتاعين النيران ديل خطرين أخير الواحد يتبرفش عليهم. وكان فى واحد اسمو محمد محمود ( ده غايتو إلا تسالو منو ماما هدى فما فوق).المهم قلت ليهو انتو بالطريقه دى طيرتو منى الجامعه ,وبينى بينكم هى كانت (الثانوى العالى جدا),.توضيح لى ناس عاطف وما اصغر يعنى فراعى (جامعه القاهره فرع الخرطوم). دحين ادونى جواب عشان إشتغل فى بورتسودان.
اها شلت جوابى ومشيت... عديل على مكتب المدير, وقتها كان مدير المكتب الوالد عبد الله محمد الحسن (نصر الدين اخبارو شنو).
يا ابنى شغلك ده مع شئون الافراد.......يا حاج الجواب للمدير......ما فاضى يا ابنى......كلمه منى وكلمتين منو تم طردى من المكتب! انتو عارفين الوكت داك انا كت فاكر نفسى ضابط بحرى ....ضابط بحرى الشويه دى .....اظنى قايل نفسى تحت ابو صلاح بى شويه كده .
رجعت واسفى فى عيونى....وبعد الاسف الفيها داك تطاير منها الشرر...وبدات تلوح لى جحافل بنى جعل ........المك نمر...اسماعيل باشا والكدوس..الله اكبر. لم تهدى ثائرتى إلا وانا ممسكا التلفون وضارب لى ابو صلاح فى البيت!!!تصوروا...رد على واحد من اولادو عله الزميل لاحقا (عمر).
أبوك فى..ادينى ليهو.. وفتحت الموضوع ... لية..كيف..لماذا..العمل العام..المسؤليه..وانت فاكرها حقت ابوك.... الخ ...غايتو ما خليت شعار من شعارات الثانوى ما استعملتو.
يا ابنى ده وكت راحتى...با ابنى تعال المكتب. يا ابنى ويا ابنى إلا ان قفل السماعه فى وشى...فوعدت نفسى بالثبور وعظائم الإمور وقلت اصلها بايظة بايظة.
تخيلو احبتى ماذا فعل ذلك الهرم؟؟؟؟؟ لا شى البته والدليل هأنذا اكتب فى منتداكم العامر ضابطا بحريا,وتخيلوا كذلك لو كان ده المحوقل بتاع جنى.. والله كانت طوريتى فى كتفى ليوم الليله..... ولكنه الترفع عن الصغائر وتفهم طبيعة البشر وطيش وحماس شاب ليس له درايه بالبرتكول وماشابه ذلك .الا رحم الله طيب الذكر الهرم صلاح الدين عمر عبد العزيز